ޓޫރިޒަމް ދާއިރާ އިން އަންހެނުންނަށް ދިމާވާ ގޮންޖެހުންތަކަށް ހައްލު ހޯއްދަވައި ދެއްވާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
"ފަހި ފަތުރުވެރިކަމަށް އަންހެނުން" ޕްރޮގްރާމް އިފްތިތާހުކުރުމަށް ބޭއްވި ހަފުލާގައި މިނިސްޓަރު ވިދާޅުވީ އެ ސިނާއަތަކީ ވަޒީފާގެ ގިނަ ފުރުސަތުތަކެއް ހުޅުވާލެވިފައިވާ ދާއިރާއެއް ކަމަށެވެ. އެކަމަކު ރިސޯޓުތަކުގައި ވަޒީފާ އަދާކުރާ ދިވެހި އަންހެނުންގެ އަދަދު ނިސްބަތުން މަދުކަން ފާހަގަކުރައްވައި މިނިސްޓަރު ވަނީ ވީހާ ވެސް ގިނަ އަންހެނުން ރާއްޖޭގެ އިގުތިސާދުގެ މައި ސިނަމާއަތަށް ނުކުތުމަށް ގޮވާލައްވައިފަ އެވެ.
"ދިވެހި އަންހެނުން މިއިންޑަސްޓްރީގައި ހުރި ގޮންޖެހުންތަކާ އެކީ ނިކުމެ ކުރިމަތިލާންވީ، ސަރުކާރުން މި ސިނާއަތުގައި ހުރި ގޮންޖެހުންތަކަށް ހައްލު ހޯދައި ދޭނެ." ފައިސަލް ވިދާޅުވި އެވެ.
"ފަހި ފަތުރުވެރިކަމަށް އަންހެނުން" ޕްރޮގްރާމް މެދުވެރިކޮށް ދާއިރާ އަށް އަންހެނުން ނެރުމަށްޓަކައި ޚާއްސަ މެންޓާންޝިޕް ޕްރޮގްރާމްތަކެއް ކުރިއަށް ގެންދަން ވެސް ވަނީ ނިންމައިފަ އެވެ. އަހަރަކު ދެ ފަހަރު ހިންގުމަށް ނިންމާފައިވާ މިޕްރޮގްރާމްގެ ތެރެއިން ތިން މަސް ދުވަހުގެ މަސައްކަތުގެ ހުނަރު ދަސްކޮށް ދޭނެ އެވެ.
"ފަތުރުވެރިކަމުގެ އެކި ދާއިރާތަކުން ތަޖުރިބާކާރު މެންޓަރިންއާއެކު، މަސައްކަތްކުރާ މާހައުލުގައި ތިން މަސްދުވަސް ހޭދަކޮށް، އަމަލީ ތަޖުރިބާ ލިބިގެން ދާނެ." މިނިސްޓަރު ވިދާޅުވި އެވެ. "މި ޕްރޮގްރާމާއެކު ފަތުރުވެރިިކަމުގެ ދާއިރާއަށް އަންހެނުން ނިކުންނަ މިންވަރު އިތުރުވެގެންދާނެ ކަމަށް ޤަބޫލުކުރަން."
"ފަހި ފަތުރުވެރިކަމަށް އަންހެނުން" ޕްރޮގްރާމްގައި ބައިވެރިވާން ވެސް މިހާރު ވަނީ ހުޅުވާލައިފަ އެވެ.
ޓޫރިޒަމް ދާއިރާގައި މަސައްކަތްކުރާ އަންހެނުން އިތުރުކުރަން ޕްރޮގްރާމެއް ފެށުމަކީ ރައީސް ޑރ. މުހައްމަދު މުއިއްޒުގެ "ހަފުތާ 14" މަގުޗާޓުގައި ވެސް ހިމެނޭ ކަމެކެވެ.