ދުއާ ކުރަން ހޯމް މިނިސްޓަރު އުމަރު ނަސީރުގެ ހުއްދައެއް ބޭނުންނުވާ ކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް (ރޮޒޭ) ވިދާޅުވެއްޖެ އެވެ.
ރޮޒޭ ކުރެއްވި ޓުވީޓެއްގައި ވިދާޅުވީ ހޯމް މިނިސްޓަރު އުމަރުގެ ހުއްދައެއް ދުއާ ކުރާކަށް ބޭނުން ނުވާ ކަމަށާއި އެ ހުއްދައަކަށް ނުވެސް އެދޭނެ ކަމަށެވެ.
ރޮޒެއިނާ ހޯމް މިނިސްޓަރަށް ބަހުގެ ހަމަލާތަކެއް ފޮނުވާފައި މި ވަނީ މިސްކިތްތަކުގައި ހިންގާ ސިޔާސީ ހަރަކާތްތައް ފުލުހުން ނިކުމެ ހުއްޓުވަން ޖެހޭނެ ކަމަށް އުމަރު ނަސީރު ހުކުރު ދުވަހު ވިދާޅުވުމާ ގުޅިގެންނެވެ.
ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ފޮރުވައިގެން ގެންގުޅުނު މައްސަލައިގައި ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ކުށް ސާބިތުވެ، 13 އަހަރަށް ޖަލަށް ލުމަށް ކްރިމިނަލް ކޯޓުން މި މަހުގެ 13 ވަނަ ދުވަހު ހުކުމް ކުރުމާ ގުޅިގެން ރައީސް ނަޝީދަށް މިނިވަންކަމާއި ސަލާމަތާއި ރައްކާތެރި ކަމަށް އެދި އިސްލާމީ މަރުކަޒުގެ ބޭރުގައި އެމްޑީޕީގެ ސަޕޯޓަރުންތަކެއް ވަނީ ދިޔަ ހުކުރު ދުވަހު ދުއާކޮށްފަ އެވެ.
އިސްލާމީ މަރުކަޒުގައި ހިންގި މި ހަރަކާތާ އުމަރު ކުރެއްވި ޓުވީޓުގައި ވިދާޅުވެފައި ވަނީ މިސްކިތްތަކާއި މިސްކިތުގެ ވަށައިގެންވާ ސަރަހައްދުތައް ސިޔާސީ ބަޔާންތައް ދިނުމުގައި ބޭނުން ކުރެވިގެން ނުވާނެ ކަމަށެވެ. އަދި މިކަމާއި ދެކޮޅަށް ފުލުހުން ނިކުމެ، ފިޔަވަޅު އެޅެން ޖެހޭނެ ކަމަށް ވިދާޅުވި އެވެ.