ހޮންކޮން އެއާލައިންސްގެ ސީދާ ދަތުރުތައް މިރޭ ރާއްޖެ އަށް ފަށަން ނިންމައިފި އެވެ.
އެ އެއާލައިންގެ ދަތުރުތައް އަލުން ރާއްޖެ އަށް މި ފަށަނީ ކޮވިޑްގެ ވަބާއާ ގުޅިގެން ދަތުރުތައް މެދުކަނޑާލާފައި އޮންނަތާ ގިނަ ދުވަސްތަކެއް ފަހުންނެވެ. ހޮންކޮންގް އެއާލައިންސްގެ ދަތުރުތައް ރާއްޖެ އަށް މެދުކަނޑާލީ ޑިސެމްބަރު 6، 2021 ގަ އެވެ.
މިރޭ އަލުން ވެލާނާ އިންޓަނޭޝަނަލް އެއާޕޯޓަށް ސީދާ ހޮންކޮންގުން ފަށާ ދަތުރުތަކާ އެކީ ކުރިއަށް އޮތް ތަނުގައި ހަފުތާ އަކު ތިން ފުލައިޓު ބާއްވާނެ އެވެ. އެއީ ހުކުރު، އާދިއްތަ އަދި ބުދައިގަ އެވެ.
ރާއްޖެ އަށް މިހާރު ބޭރުގެ 39 އެއާލައިނަކުން އެކި މަންޒިލުތަކާ ދެމެދު ސީދާ ދަތުރުތައް ކުރެ އެވެ.
ހޮންކޮންގް އެއާލައިންސްގެ ދަތުރުތައް ރާއްޖެ އަލުން މި ފަށަނީ ޗައިނާ، ރާއްޖޭގެ އެއް ވަނަ މާކެޓަށް ހަދަން ސަރުކާރުން އަމާޒު ހިފާފައި ވަނިކޮށެވެ. އެގޮތުން އެ ގައުމުގެ އިތުރު އެއާލައިންތައް ރާއްޖެ ގެންނަން މަސައްކަތް ކުރެވެމުން އަންނަ އިރު، އަންނަ މަހުގެ ތެރޭގައި ޝިއަމެންގެ އެއާގެ ދަތުރުތައް ވެސް ރާއްޖެ އަށް ފަށާނެ އެވެ.
ރާއްޖޭގެ އިގުތިސާދު ޓޫރިިޒަމަށް ބަރޯސާވެފައިވާތީ ބޭރުގެ ވީހާ ވެސް ގިނަ އެއާލައިންތަކުގެ ދަތުރުތައް ރާއްޖެ އަށް ގެނައުމަކީ ސަރުކާރުން އަބަދު ވެސް ވަރަށް ބޮޑު އިސްކަމެއް ދޭ ކަމެކެވެ.
މި އަހަރު ރާއްޖެ އަށް ދެ މިލިއަން ޓޫރިސްޓުން ގެންނަން ވަނީ އަމާޒު ހިފައިފަ އެވެ.