ޗައިނާގެ ހޮންގްކޮންގް އެއާލައިންސްއިން ހުއްޓާލާފައިވާ ދަތުރުތައް އަލުން ފަށައިފިއެވެ.
މިރޭ 7:15 އެހައިކަށްހާއިރު، ވެލާނާ އިންޓަނޭޝަނަލް އެއާޕޯޓުގައި ޖެއްސި ފްލައިޓުން 209 މީހުން ވަނީ އައިސްފައެވެ. މި ފްލައިޓަކީ އެއާބަސްގެ އޭ-333 މަރުކާގެ ބޯޓެއް ކަމަށް އެމްއޭސީއެލްއިން ބުނެއެވެ. ހޮންގްކޮންގް އެއާލައިންސްގެ ދަތުރުތައް އަލުން ރާއްޖެއަށް ފެށިއިރު، ހަފްތާއަކު 3 ދަތުރު ކުރުމަށް ވަނީ ހަމަޖެހިފައެވެ.
މިރޭ ފްލައިޓުން އައި ފަސިންޖަރުންނަށް ވެލާނާ އެއާޕޯޓުން ވަނީ ހޫނު މަރުހަބާއެއް ކިޔާފައެވެ. އެގޮތުން ވެލާނާ އެއާޕޯޓުން ފްލައިޓަށް މަރުހަބާ ދެންނެވުމަށް އެމްއޭސީއެލްގެ އިސްވެރިންނާއި، އެމްއެމްޕީއާރްސީގެ މެނޭޖިންގް ޑިރެކްޓަރ ފާތިމަތު ތައުފީޤް އާއި ޗައިނާއިން ދިވެހި ރާއްޖެއަށް ކަނޑައަޅާފައި ހުންނަވާ ސަފީރު ވެންގް ލިޝިން ވަނީ ބައިވެރިވެވަޑައިގެންފައެވެ.
ޗައިނާގެ ހޮންގްކޮންގް އެއާލައިންސް ދަތުރުތައް ރާއްޖެއަށް ފެށުމާއެކު، މިހާރު ޗައިނާއިން ރާއްޖެއަށް 4 އެއާލައިނެއް ދަތުރުކުރެއެވެ. އެއީ ޗައިނާ އީސްޓަން އެއާލައިން، ސީޗުއާން އެއާލައިން، ހޮންގް ކޮންގް އެއާލައިންސް އަދި ބެއިޖިން ކެޕިޓަލް އެއާލައިންސްއެވެ.
ރައީސް ދާދި ފަހުން ޗައިނާއަށް ކުރެއްވި ފުރަމާނަ ދަތުރުފުޅުގައި ވަނީ ރާއްޖެއަށް ފަތުރުވެރިން އަންނަ އެއްވަނަ މާކެޓަށް ޗައިނާ ހެދުމަށް މަސައްކަތް ކުރުމަށް އެދިލައްވާފައެވެ. މިއާއެކު ޗައިނާ މާކެޓުގައި ހާއްސާ ޕްރޮމޯޝަން ހަރަކާތްތަކެއް ހިންގުމަށް ހަމަޖެހިފައިވާއިރު، މިމާކެޓު ކުރިއެރުވުމަށް މަސައްކަތް ކުރަމުންދާއިރު، މިވަގުތު ޗައިނާއަކީ މިއަހަރު ރާއްޖެއަށް 6 ވަނަ އަށް އެންމެ ގިނަ މީހުން ޒިޔާރަތް ކުރާ މާކެޓެވެ. މިމަހުގެ 17 އާއި ހަމައަށް އެ ޤައުމުން 5821 ފަތުރުވެރިން ވަނީ ޒިޔާރަތް ކޮށްފައެވެ.