ކ. މާފުށީ ޖަލުގެ ގައިދީންނަށް ކަސަބު ވިޔަން ދަސްކޮށްދޭން ތައްޔާރުވާން ފަށައިފި އެވެ.
އެގޮތުން މިކަމަށް ހާއްސަކޮށްގެެން ފެށި ވޯކްޝޮޕެެއްގައި ކަރެކްޝަނަލް ސާވިސްގެ 8 އޮފިސަރަކު އަންނަނީ އެ މަސައްކަތް ދަސްކުރަމުންނެވެ. އޭގެ ތެރޭގައި ހިމެނެނީ އަންހެން ތިން އޮފިސަރަކާއި ފިރިހެން ތން އޮފިސަރެކެވެ. މި އޮފިސަރުން ކަސަބު ވިޔަން ދަސްކުރަން ދެ ހަފުތާގެ ވޯކްޝޮޕަކަށް ފަހު، އެ މަސައްކަތް ގައިދީންނަށް ދަސްކޮށްދޭނެ ކަމަށް ކަރެކްޝަންސް އިން ބުންޏެވެ.
އެތަނުން ބުނީ މީގެ މައިގަނޑު މަގުސަދަކީ މާފުށީ ޖަލުގައި މި އަހަރު ގާއިމުކުރަން ނިންމާފައިވާ ކަލްޗަރަލް ސެންޓަރުގައި ދިވެހި ސަގާފީ މަސައްކަތްތައް ދައްކާލުމަށާއި، އެ މަސައްކަތްތައް އާލާކޮށް ދިރުވައި، ޖަލުގައި ހުކުމް ތަންފީޒު ކުރަމުންދާ ގައިދީންނަށް މަސައްކަތްތައް ދަސްކޮށް ދިނުން ކަމަށެވެ.
ކަރެކްޝަންސް އިން ބުނި ގޮތުގައި ހުނަރުތައް ދަސްކޮށް ދޭން ގައިދީންނަށް ހިންގާ މިފަދަ ޕްރޮގްރާމްތަކުގެ ސަބަބުން އެ މީހުން ޖަލުގައި ހޭދަ ކުރާ ދުވަސްތަކުގައި ފައިދާކުރުވަނިވި ދުވަސްތަކަކަށް ހެދުމަށާއި، ކުށްކުރުމުން ދުރުހެލިކޮށް، ރަނގަޅު ފަރުދުންގެ ގޮތުގައި އަނބުރާ މުޖުތަމައުއަށް ނިކުމެ އާމްދަނީ ހޯދުމަށް ކުރާނެ މަސައްކަތެއް ދަސްވާނެ އެވެ.
މާފުށީ ޖަލުގައި ގާއިމުކުރާ ކަލްޗަރަލް ސެންޓަރުގައި ސަގާފީ މަސައްކަތްތަކާ ގުޅޭ އިތުރު ތަމްރީން ޕްރޮގްރާމްތައް ވެސް ކުރިއަށް ގެންދިއުމަށް ހަމަޖެހިފައިވާ ކަމަށް ކަރެކްޝަންސް އިން ބުންޏެވެ.