ފުވައްމުލަކުގައި އެކްސިޑެންޓްވި މީހަކު އިތުރު ފަރުވާ އަށް މާލެ ގެންގޮސްފި އެވެ.
އެ މީހާ މާލެ ގެންދިޔައީ ރޭ މެންދަރު މޯލްޑިވިއަންގެ ޗާޓަރު ފްލައިޓެއްގަ އެވެ. އެ މީހާ އެކްސިޑެންޓްވީ ފުވައްމުލަކުގެ ބޮޑުފަންނު މަގުން ދުއްވާފައި ދަނިކޮށް ސައިކަލު ފާރެއްގައި ޖެހިގެންނެވެ. އެއީ 30 އަހަރުގެ ފިރިހެނެކެވެ. ފުލުހުންނަށް މި ހާދިސާގެ ރިޕޯޓް ލިބުނީ ރޭ 10:15 ހާއިރު އެވެ.
އެ އެކްސިޑެންޓުގައި އަނިޔާވީ އުމުރުން 30 އަހަރުގެ ދިވެހި ފިރިހެނަކަށެވެ. މި ހާދިސާ ފުލުހުން އަންނަނީ އިތުރަށް ބަލަމުންނެވެ.
މިކަމާ ގުޅޭ ގޮތުން ކައުންސިލްތަކާ ބެހޭ މިނިސްޓަރު އާދަމް ޝަރީފް ވިދާޅުވެފައި ވަނީ މިއީ 24 ގަޑިއިރުގެ ތެރޭގައި މޯލްޑިވިއަނުން އެމެޖެންސީގައި މީހުން އުފުލާ ތިން ވަނަ ޗާޓަރު ފްލައިޓް ކަމަށެވެ.
ގއ. ވިލިނގިލީގެ ހާލު ސީރިއަސްވި ކުޑަ ކުއްޖަކު އިއްޔެ ފަރުވާ މާލެ ގެނައުން ލަސްވެގެން ނިޔާވި މައްސަލައެއް ފެންމަތިވެ، ސަރުކާރަށް ބޮޑެތި ފާޑުކިޔުންތަކެއް އަމާޒުވެފައިވެ އެވެ. މިކަމާ ގުޅިގެން ސަރުކާރުން މިހާރު ވަނީ ކުއްލި ހާލަތުގައި ދިިމާވާ މެޑިކަލް އެމާޖެންސީތަކަށް މޯލްޑިވިއަނުން އިސްކަންދޭ ގޮތަށް އުސޫލަށް ބަދަލު ގެނެސްފަ އެވެ.