ފުލުހުންނަށް ހާއްސަކޮށްގެން ހަދާ ފްލެޓްތަކުގެ މަސައްކަތްތައް ކުރިއަށް އޮތް ހަތަރު ވަރަކަށް މަހުގެ ތެރޭގައި އެއްކޮށް ނިންމާލައި އެތަންނަށް ވަދެވޭ ވަރު ވާނެ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
ވީޓީވީގައި މިނިސްޓަރު ވިދާޅުވީ ފުލުހުންގެ ފުލެޓް މަޝްރޫއަކީ ނުނިމި ވަރަށް ބޮޑަށް ދިގުލައިގެން ގޮސްފައި އޮތް ކަމެއް ކަމަށެވެ.
"އަޅުގަނޑުމެން މި ބަލަނީ ފެބްރުއަރީ މަހުގެ ނިޔަލަށް އެ ފުލެޓުތަކުގެ އިންޓީރިއާގައި އަދި ފިނިޝިންގައި ކުރަންޖެހޭ ހުރިހާ މަސައްކަތެއް ނިންމުމަށް. އަދި މިހާރު ގެނެވިފައިވާ ލިފްޓުތައް ވެސް، އިންސްޓޯލް ކުރުމުގެ މަސައްކަތް މިހާރު އެދަނީ ފެށެމުން،" އިހުސާން ވިދާޅުވ އެވެ. "އަޅުގަނޑުމެންގެ ޓާގެޓަކީ މި ދެންނެވި، ފުރަތަމަ ގެނެސްފައިވާ ލިފްޓުތައް، ރަމަޟާން މަހަށް ވާންވާ އިރަށް ހަރުކުރެވޭތޯ މަސައްކަތްކުރުން. އަދި ކުރިއަށް އޮތް ތިން ހަތަރު މަސް ތެރޭގައި، ބާކީ ހުރި ލިފްޓުތައް ވެސް ގެނެސް ހަރުކުރެވޭތޯ އެއީ އަޅުގަނޑުމެން އަމާޒު ހިފާނެ ގޮތަކީ".
ފުލުހުންނަށް ހާއްސަކޮށްގެން ފްލެޓް މަޝްރޫއެއް ފެއްޓެވީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރުގަ އެވެ.