ދާދި ފަހުން ރާއްޖެ އިން ޗައިނާއެކީ ވި އެއްބަސްވުންތަކަށް އަމަލީ ސިފަ ގެނައުމާ ގުޅޭ ގޮތުން މަޝްވަރާކޮށްފި އެވެ،
މިކަމާ ގުޅޭ ގޮތުން މަޝްވަރާކުރީ ޗައިނާގެ އިންޓަނޭޝަނަލް ޑިޕާޓްމަންޓް އޮފް ދަ ޗައިނީސް ކޮމިއުނިސްޓް ޕާޓީ، ސުން ހައިޔާން ރައީސް ޑރ. މުހައްމަދު މުޢިއްޒުގެ އަރިހަށް މިއަދު ކުރެއްވި އިހުތިރާމުގެ ޒިޔާރަތުގަ އެވެ.
އެ ބައްދަލުވުމުގައި ރައީސް ވިދާޅުވީ ދެ ގައުމުގެ ދެމެދު ސޮއިކުރެވުނު އެއްބަސްވުންތައް ތަންފީޒުކުރެވިވިގެން ދިއުމަކީ އެދިވަޑައިގަންނަވާ ކަމަށާއި އެކަމުގައި ރާއްޖެ އޮތީ ތައްޔާރަށް ކަމަށެވެ.
މި މަހުގެ 7-20 އަށް ރައީސް ޗައިނާ އަށް ކުރެއްވި ދަތުރުގައި އެކި ދާއިރާތަކުން އެ ގައުމާ އެކީ 20 އެއްބަސްވުމެއްގައި ސޮއިކުރި އެވެ.
މިއަދުގެ ބައްދަލުވުމުގައި ރާއްޖެ އާއި ޗައިނާއާ ދެމެދު ކާމިޔާބުކަމާ އެކީ ސީދާ ވައިގެ ދަތުރުތައް ފަށާފައިވާތީ އެކަމާ ގުޅޭ ގޮތުންނާއި، ދެ ގައުމުގެ ދެމެދު ކުރާ ސީދާ ވައިގެ ދަތުރުތައް ޗައިނާގެ އިތުރު ސިޓީތަކަށް ފުޅާކުރެވޭނެ ގޮތްތަކާ ގުޅޭ ގޮތުން ވެސް މަޝްވަރާކުރި އެވެ.
މީގެ އިތުރުން، ޗައިނާ އާއި ރާއްޖޭގެ އެއް ސިޓީ އަނެއް ސިޓީއާ ދެމެދު އިތުރަށް ގުޅުން ބަދަހިކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާކުރެއްވި އެވެ.