ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ނިޒާމު އިތުރަށް ހަރުދަނާ ކުރުމަށް ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ) ގެ އެހީތެރިކަން ހޯދުމަށް މަޝްވަރާކޮށްފި އެވެ.
އިއްޔެ ޓްރާންސްޕޯޓް މިނިސްޓަރު މުހައްމަދު އަމީން ވަނީ ޖޭއައިސީއޭގެ އޮފިޝަލުންނާ ބައްދަލުކުރައްވައި، އެކަމާ ގުޅޭގޮތުން މަޝްވާރާތަކެއް ކުރައްވައިފަ އެވެ.
އެކަމާ ގުޅޭ ގޮތުން އެ މިނިސްޓްރީން ބުނީ އާރްޓީއެލް ފެރީ ޚިދުމަތް އިތުރަށް ހަރުދަނާ ކުރުމަށް ޖޭއައިސީއޭގެ ފަރާތުން ޓެކްނިކަލް ކޮންސަލްޓެންސީ ދިނުމާ ބެހޭ ގޮތުން މަޝްވަރާތަކެއް ކުރެވުނު ކަމަށެވެ. އަދި މާލެ ސަރަހައްދުގައި ހަދާ ފެރީ ޓާމިނަލްތަކުގެ ޚިދުމަތް އިތުރަށް ރަނގަޅުކުރަން ކުރެވިދާނެ ކަންކަމާ ގުޅޭ ގޮތުން ވެސް މަޝްވަރާކުރި އެވެ.
އާރްޓީއެލް ފެރީގެ ހިދުމަތް މިހާރު ދެމުން އަންނަނީ ހއ. އަތޮޅާއި ހދ، ށ، ޅ، ގއ، ގދ އަތޮޅުގެ އިތުރުން އައްޑޫ އާއި ފުވައްމުލަކުގަ އެވެ. ކުރީގެ ސަރުކާރުން ފެށި މި ހިދުމަތް މުޅި ރާއްޖެ އަށް ފުޅާކުރަން ހަމަޖެހިފައިވެ އެވެ.
އާރްޓީއެލްގެ ދަށުން އާބާދީ ބޮޑެތި ސަރަހައްދުތަކުގައި އަންނަނީ ބަހުގެ ހިދުމަތް ވެސް ދެމުންނެވެ. އާރްޓީލްގެ ފެރީ އާއި ބަހިހެ ހިދުމަތް ދެމުން އަންނަނީ އެމްޓީސީސީ މެދުވެރިކޮށެވެ.