އެމެރިކާގެ މަޝްހޫރު ޔޫޓިއުބާ، މިސްޓަ ބީސްޓާ އެކީ ރިއަލިޓީ ޝޯއެއް ގެނެސްދޭން އެމެޒޯން ޕްރައިމް ވީޑިއޯ އިން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފި އެވެ.
ވެރައިޓީން ބުނީ މި ޝޯއާ ގުޅޭ ގޮތުން ދެ ފަރާތުގެ މެދުގައި މަޝްވަރާތައް ކުރިއަށްދާ ކަމަށާއި ވަރަށް އަވަހަށް އެއްބަސްވުމަކަށް އާދެވި، ޝޯ މާ ލަސްތަކެއް ނުވެ އިއުލާން ކުރާނެ ކަމަށެވެ. އަދި މިއީ ގާތްގަނޑަކަށް 100 މިލިއަން ޑޮލަރުގެ އެއްބަސްވުމަކަށް ވާނެ ކަމަށް ވެސް އެ ނޫހުން ބުންޏެވެ.
ނަމަވެސް މި ޝޯއާ ބެހޭ މާ ބޮޑު ތަފުސީލެއް އަދި ނުލިބެ އެވެ. އެކަމަކު އެމެޒޯން ޕްރައިމްގެ އަމާޒަކީ މިސްޓަ ބީސްޓް ޔޫޓިއުބްގައި ގެނެސްދޭ ކަހަލަ ޗެލެންތަކާ އެކީ ވަރަށް ޝައުގުވެރި ރިއަލިޓީ ޝޯއެއް ގެނެސްދިނުން ކަމަށް ވެރައިޓީން ބުންޏެވެ.
އަސްލު ނަމުން ނަމަ ޖިމީ ޑޮނަލްޑްސަން، 25، އަކީ ދުނިޔޭގެ އެންމެ ނުފޫޒު އެއް ޔޫޓިއުބަރެވެ. އޭނަގެ ޔޫޓިއުބްގެ ސަބްސްކްރައިބަރުންގެ އަދަދު 233 މިލިއަނަށް އަރަ އެވެ. ޖޫން 2022 އިން ޖޫން 2023 އަށް މިސްޓަ ބީސްޓަށް އާމްދަނީގެ ގޮތުގައި 82 މިިލިއަން ޑޮލަރު ލިބިފައިވެ އެވެ.
ތަފާތު އެކިއެކި ގޮތްގޮތުން އެކި ފަރާތްތަކަށް މާލީ އެހީ ވެސް ވަމުން އަންނަ މިސްޓަ ބީސްޓް 2022 ގައި ރާއްޖެ ވެސް އައިސްފައިވެ އެވެ.