މި އަހަރުގެ ފުރަތަމަ ތިން ހަފުތާގައި ރާއްޖެ އަށް ޖުމްލަ 128،548 ޓޫރިސްޓުން އައިސްފައިވާ އިރު މިދިޔަ އަހަރު އެންމެ ގިނަ ޓޫރިސްޓުން އައި އިންޑިއާ އިން މިހާތަނަށް އައީ 9،744 ޓޫރިސްޓުން ކަމަށް ޓޫރިޒަމް މިނިސްޓްރީން ބުނެފި އެވެ.
އެ މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާ ގޮތުން އިންޑިއާގެ އެ އަދަދާ އެކީ އެ ގައުމު މިހާރު އޮތީ ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމުގެ ފަސް ވަނައިގަ އެވެ. އިންޑިއާ އިން މިހާރު ދަނީ ރާއްޖެ ބޮއިކޮޓްކުރަން ކެމްޕޭންތަކެއް ވެސް ކުރަމުންނެވެ. ނަމަވެސް އެ ކެމްޕޭންގެ ސަބަބުން އިންޑިއާ އިން އަންނަ ޓޫރިސްޓުން މަދުނުވާ ކަމަށް މަޓޯޓާ އިން މިދިޔަ ހަފުތާގައި ބުނެފައިވެ އެވެ.
އެ ޖަމިއްޔާ އިން ބުނީ ޖެނުއަރީ މަހަކީ އާންމުކޮށް އިންޑިއާގެ ޓޫރިސްޓުން އައުން މަދު މަހެއް ކަމަށެވެ. އެހެންވެ އެއީ ބޮއިކޮޓް ކެމްޕޭނާ އެއްވެސް ގުޅުމެއް އޮތް ކަމެއް ނޫން ކަމަށް ބުނެފައިވެ އެވެ.
މި މަހުގެ 21 އާ ހަމައަށް ރާއްޖެ އެންމެ ގިނަ ޓޫރިސްޓުން އައީ މިދިޔަ އަހަރު ދެވަނައިގައި އޮތް ރަޝިއާއިންނެވެ. އެ ގައުމުން 14،495 ޓޫރިސްޓުން އައިސްފައިވެ އެވެ. ދެވަނައިގައި އޮތް އިޓަލީން 13،965 ޓޫރިސްޓުން އައިސްފައިވާ އިރު، ތިން ވަނައިގައި އޮތް އިނގިރޭސިވިލާތުން 10،698 ޓޫރިސްޓުން އައިސްފައިވެ އެވެ.
ގަދަ 10 ގައި ދެން ހިމެނެނީ ޗައިނާ (10،113 ޓޫރިސްޓުން)، ޖަރުމަން (8،013 ޓޫރިސްޓުން)، އެމެރިކާ (4،857 ޓޫރިސްޓުން)، ފްރާންސް (4،471 ޓޫރިސްޓުން)، ޕޮލެންޑް (3،685 ޓޫރިސްޓުން) އަދި ކަޒަކަސްތާން (2،717 ޓޫރިސްޓުން) އެވެ.
ރާއްޖެ އިން މިހާރު ދެ މިލިއަން ޓޫރިސްޓުން ގެންނަން އަމާޒު ހިފާފައިވާ އިރު، އެއްވަނަ މާކެޓަށް ޗައިނާ އެރުވުމަކީ ސަރުކާރުގެ ވަރަށް ބޮޑު އަމާޒެކެވެ. އެ ގައުމަކީ މިދިޔަ އަހަރު ތިން ވަނަ އަށް އެންމެ ގިނަ ޓޫރިސްޓުން އައި ގައުމެވެ.