މާޗް މަހު ބާއްވާ ރައްޔިތުންގެ މަޖިލިސް އިންތިހާބުގައި ވޯޓްލުން ކުރިއަށް ގެންދާނީ ހެނދުނު 8:00 އިން ހަވީރު 5:00 އާ ހަމައަށް ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
މިހާރު ކުރިއަށްދާ އިންތިހާބަށް ލަފާދޭ ކޮމިޓީގެ ބައްދަލުވުމުގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ ވޯޓްލާ މީހުންނަށް ވެސް ވީހާ ވެސް ބޮޑަށް ފަސޭހަކުރަން ބޭނުންވާ ކަމަށެވެ. އެގޮތުން ވޯޓްލާ ގަޑިއަކަށް ކަނޑައަޅާފައި ވަނީ ހެނދުނު 8:00 އިން ހަވީރު 5:00 އާ ކަމަށް ވިދާޅުވި އެވެ.
"މި ވަގުތުގެ ތެރޭގައި ގިނަ ބަޔަކަށް ވޯޓްލެވޭނެ ކަމަށް އަޅުގަނޑު ގަބޫލުކުރަނީ. ހަބީބު ވިދާޅުވި އެވެ.
އޭނަ ވިދާޅުވީ ކުރީގެ އިންތިހާބުތަކާ ހިލާފަށް މަޖިލިސް އިންތިހާބުގައި ވޯޓް ގުނަން ފަށާނީ ވޯޓްފޮށިތައް ބަންދުކުރާތާ ބައި ގަޑިއިރި ފަހުން ކަމަށެވެ. ކުރިން ވޯޓް ގުނަން ފަށަނީ ވޯޓްލައި ނިމޭތާ ގަޑިއެއް އިރު ފަހުންނެވެ.
ހަބީބު ވިދާޅުވީ ބައިގަޑި އިރު ފަހުން ވޯޓްފޮށިތައް ގުނަން ނިންމީ އޮފިޝަލުންނަށް ވެސް ރޯދަ ވީއްލުމުގެ ކަންކަން ފަސޭހަ ކުރަން ކަމަށެވެ. އެގޮތުން ފޮށިތައް ގުނަން ފަށާނީ 6:45 ގައި ކަމަށް ވިދާޅުވި އެވެ.
މަޖިލިސް އިންތިހާބު ބާއްވަން ހަމަޖެހިފައި ވަނީ މާޗް 17 ގަ އެވެ. އެއީ ރޯދަ މަހުގެ ފުރަތަމަ ހަފުތާތެރެ އެވެ
ވޯޓްލާ ގަޑިއާ މެދު ބައެއް ޕާޓީތަކުން ކަންބޮޑުވުން ފާޅުކޮށް ގަޑިއަކަށް ހެނދުނު 9:00 އިން ހަވީރު 6:00 އަށް ކަނޑައެޅުމަށް ވެސް ލަފާ ދީފައިވެ އެވެ.