އައްޑޫގައި ކާޑުގެ ބާވަތްތައް ވިއްކާނެ އެޖެންޓުން ހޯދަން ކައުންސިލުން އިއުލާންކޮށްފި އެވެ.
އެތަނުން ބުނީ ހަނޑުލާއި ހަކުރު އަދި ފުށް ވިއްކުމަށްޓަކައި ހިތަދު އާއި ފޭދު އާއި މަރަދޫފޭދޫގެ އިތުރުން ހުޅުމީދޫން ކާޑު އެޖެންޓުން ނެގުމަށް އެސްޓީއޯ އިން ނިންމާފައިވާ ކަމަށެވެ. އެޖެންޓުންނަށް ކާޑުގެ ބާވަތްތައް ދޫކުރަން ހަމަޖެހިފައި ވަނީ އެސްޓީއޯގެ އައްޑު ފިހާރަތަކުގެ ގުދަނުންނެވެ. އަދި އެޖެންޓުންނަށް ކާޑު ވިއްކާނީ މާލޭގައި ހުންނަ އެސްޓީއޯގެ ކާޑު ގުދަނުން ވެސް ވިއްކާ ރޭޓުން ކަމަށް ބުންޏެވެ.
އެހެންވެ މިކަމަށް ޝައުގުވެރިވާ ވިޔަފާރިިތަކުން މި މަހުގެ 28 ވަނަ އައްޑޫ ސިޓީ ކައުންސިލް އިދާރާ ބަންދުވުމުގެ ކުރިން އަންގައި ދިނުމަށް އެދިފައިވެ އެވެ.
އެސްޓީއޯއިން ވަނީ ދާދި ފަހުން ރާއްޖޭގެ ހުރިހާ ސަރަހައްދެއްގައިވެސް ކާޑު ވިއްކުމަށް އޭޖެންޓު މޮޑެލްއަށް އެއްކޮށް ބަދަލު ކުރަން ނިންމާފައެވެ. މީގެ ކުރިން އައްޑޫގެ ގުޅިފައިވާ ރައްތަކަށް ކާޑު ވިއްކަމުން އައި އެސްޓީއޯއިން އަމިއްލައަށް 5ރ. ނަގައިގެން ޑެލިވަރީ ކުރާ ގޮތަށެވެ. ނަމަވެސް މިއަހަރު ފެށުނުއިރު އެސްޓީއޯއިން ވަނީ އެ އުސޫލަށް އަމަލު ކުރުން ހުއްޓާލާފައެވެ.
މިއާއެކު އައްޑޫގެ އަވަށްތަކުގައި އެސްޓީއޯގެ ފަރާތުން ކާޑު މިހާރު ޑެލިވަރީ ކޮށް ނުދެއެވެ. އެސްޓީއޯއިން ބުނެފައިވަނީ ރާއްޖޭގެ ހުރިހާ ރަށެއްގައިވެސް ކާޑު ވިއްކުމުގެ ކަންކަން ކުރިއަށް ގެންދަނީ އޭޖެންޓުން ކަމަށެވެ. އޭޖެންޓު މެދުވެރިކޮށް ބައެއް ރަށްތަކުގައި ކާޑު ޑެލިވަރީ ކުރެއެވެ.