ދިވެހި ފަންނާނުންނަށް ގެއްލުންވާ ގޮތަށް މި ސަރުކާރުން އަމަލު ނުކުރާނެ ކަމަށް، ޓުއަރިޒަމް މިނިސްޓަރ އިބްރާހިމް ފައިސަލް ވިދާޅުވެއްޖެއެވެ.
މިނިސްޓަރ މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ދިވެހި ފަންނުވެރިންނަށް ދޭން އޮތް ޔަޤީންކަމަކީ ރައީސް މުއިއްޒުގެ ސަރުކާރުން ފަންނާނުންނަށް ގެއްލުންވާފަދަ އެއްވެސް ކަމެއް ނުކުރައްވާނެ ކަމުގެ ޔަޤީންކަން ދެއްވާ ކަމަށެވެ. އަދި ދިވެހި ފަންނާނުންނަށް ފަތުރުވެރިކަމުގެ ދައިރާއިން ފަހި ފުރުސަތުތަކެއް ހޯދައިދެއްވުމަކީ، އެމަނިކުފާނުގެ އަމާޒެއް ކަމަށް ވިދާޅުވިއެވެ.
މިގޮތުން ކުރިއަށް ހުރި ދުވަސްތަކުގައި ކަމާއި ގުޅުންހުރި، ބޭފުޅުންނާއި ބައްދަލުކޮށް ހުރި ކަންބޮޑުވުންތައް އަޑު އަހާ، ރައީސްގެ ލަފާ ފުޅާއެކު ހައްލު ހޯއްދަވައި ދެއްވާނެ ކަމަށް ވިދާޅުވިއެވެ.
ފައިސަލް މިހެން ވިދާޅުވެފައި މިވަނީ، މަޓީއިން ބިދޭސީ ފަންނުވެރިން ރާއްޖެ ގެނައުމުގެ ފުރުސަތު ދިނުމަށް އެދިފައިވާ ދަނޑިވަޅެއްގައެވެ. އެގޮތުން މަޓީން ވަނީ މުޅި ސިނާޢަތަށް ބޭނުންވާ ދިވެހި ފަންނުވެރިން ނެތްކަމަށް ބުނެފައެވެ. އަދި ބިދޭސީން އެހުސްކަން ފުރަން ބޭނުންވާނެ ކަމަށް ބުނެފައެވެ.
މިކަމާއި ގުޅިގެން ދިވެހި ފަންނުވެރިން ވަނީ ވަރަށް ބޮޑަށް ކަނބޮޑުވުން ފާޅުކޮށްފައެވެ. އެގޮތުން ބައެއް ރިސޯޓުތަކުންނާއި ގެސްޓު ހައުސްތަކުންވެސް ދިވެހި ފަންނުވެރިންނަށް ފުރުސަތު ލިބެނީ މަދުންކަން ވަނީ ފާހަގަ ކޮށްފައެެވެ. އަދި ބައެއް ފަހަރު ބޭރުން ބޭންޑުތައް ގެނެސް އެހެން ބާވަތުގެ ފަންނުތައް ޕްރޮމޯޓު ކުރާ ކަމަށް ބައެއް ފަންނުވެރިން ސޯޝަލް މީޑިއާގައި ވަނީ ބުނެފައެވެ.