ހުޅުމާލޭ ޖަލުގައި ހަދަން ނިންމާފައިވާ 40 މިހުންގެ ޖާގައިގެ ހޯލްޑިން ޔުނިޓްގެ ބިންގާ އަޅައިފި އެވެ.
މޯލްޑިވްސް ކަރެކްޝަނަލް ސާވިސް (އެމްސީއެސް) އިން ބުނީ އެތަނުގެ ޔުނިޓްގެ ބިންގާ އިއްޔެ އަޅުއްވައި ދެއްވީ ކޮމިޝަނަ އޮފް ޕްރިޒަންސް ޙަސަން ޒަރީރު ކަމަށެވެ.
މި އާ ހޯލްޑިން ޔުނިޓަކީ ހުޅުމާލޭ ޖަލުގައި ތިބި ޤައިދީންނަށް ދެވޭ ޙިދުމަތާއި ދިރިއުޅުމުގެ ޙާލަތު ރަނގަޅު ކުރުމާއި، އަލަށް ޖަލަށް ގެންދާ ޤައިދީން ބަންދު މީހުން ޖަލުތަކަށް ގެންދެވެންދެން ބޭތިއްބުމާއި އެކި ބޭނުންތަކަށް މާލެ ގެންނަ ޤައިދީންނާއި ބަންދުމީހުން ގެންނަ ބޭނުން ނިމި އަނބުރާ އެޖަލުތަކަށް ގެންދެވެންދެން ބޭތިއްބޭނެ ފެސިލިޓީއެއް ކަމަށެވެ.
ކުރިން ޓްރާންސިޓްކޮށް ގެންނަ ޤައިދީންނާއި ބަންދުމީހުން ބޭތިއްބީ މާލޭ ޖަލުގަ އެވެ. ނަމަވެސް މި މަހުގެ 7 ވަނަ ދުވަހު މާލޭ ޖަލު ވަނީ ބަންދުކޮށްފަ އެވެ.
އެމްސީއެސް އިން ބުނީ އަލަށް ހަދަން ފެށި 40 މީހުންގެ ޖާގައިގެ ހޯލްޑިން ޔުނިޓްގެ އިތުރުން، ކުރިއަށް އޮތް ތަނުގައި އެ އިމާރާތަށް އިތުރު ބައިތައް އެކުލަވާލައި، ޖާގަ 77 އަށް އިތުރު ކުރެވޭނެ ކަމަށެވެ.
އިއްޔެ ބިންގާ އެޅި ޔުނިޓްގެ މަސައްކަތް 4 މަސްތެރޭގައި ނިންމަން ޖެހެ އެވެ.