އައްޑޫ ބްރިޖް އައްޑޫއަށް ބޭނުންވާ ތަރައްޤީ ގެނުވާނެ "ކެޓަލިސްޓް" ނުވަތަ ބޮޑު ބަދަލުގެ މެދުވެރިއަކަށް ވެދާނެ ކަމަށް އިންފްރާސްޓްރަކްޗަރ މިނިސްޓަރ ޑރ. އަބްދުﷲ މުއްތަލިބު ވިދާޅުވެއްޖެއެވެ.
ސަރުކާރުގެ ވަޒީރުންނާއި ރައްޔިތުން ސުވާލު ކުރުމުގެ ފުރުސަތު ދިނުމުގެ ގޮތުން ބާއްވާ "އަހާ" ފޯރަމްގެ ފުރަތަމަ ފޯރަމް މިރޭ ބާއްވާފައިވާއިރު، އެ ފޯރަމުގައި އާންމު ފަރާތަކުން ވަނީ ބޮޑެތި މަޝްރޫޢުތައް ސަރުކާރުން އިއުލާން ކުރައްވާއިރު އެއިން އިޤްތިޞާދަށް ބުރައަކަށް ވެދާނެތޯ ވަނީ ސުވާލު ކުރައްވާފައެވެ.
އެކަމާއި ގުޅޭގޮތުން ޖަވާބު ދެއްވަމުން މިނިސްޓަރ މުއްތަލިބު ވިދާޅުވީ، ރައީސް މައުމޫން 2008 ވަނަ އަހަރު މާލެއާއި ހުޅުލެ ބްރިޖް އިއުލާން ކުރެއްވިއިރުވެސް އެކަން ކުރެވޭނެ ގޮތާއި މެދު ސުވާލު އުފެއްދި ކަމަށެވެ. ނަމަވެސް ސިނަމާލެ ބްރިޖުގެ ސަބަބުން ހުޅުމާލެއަށް އައި ބަދަލާއި ފެށިގެން ދިޔަ ވިޔަފާރިތަކާއި އެކު، އިޤްތިޞާދީ ގޮތުން އައި ބޮޑު ބަދަލު އޮތީ ފެންނަން ކަމަށް ވިދާޅުވިއެވެ.
އެގޮތުން ސީދާ ދިރާސާއެއް ނެތަސް ސިނަމާލެ ބްރިޖަށް ޚަރަދު ކުރިވަރަށް ވުރެ ބޮޑު އެއްޗެއް ރާއްޖޭގެ އިޤްތިޞާދަށް އިތުރު ވެފައިވާނެ ކަމަށް މިނިސްޓަރ މުއްތަލިބު ވިދާޅުވިއެވެ. އަދި އިޤްތިޞާދެއް ކުރިއެރުވުމަށް ކަނެކްޓިވިޓީއަކީ ވަރަށް މުހިންމު އެއްޗެއް ކަމަށް ވިދާޅުވިއެވެ.
މިނިސްޓަރ އެއާއި ގުޅުވައި ވިދާޅުވީ އައްޑޫ ތަރައްޤީ ކުރަން ޖެހޭ ވާހަކައަކީ ޒަމާނުއްސުރެ ދެކެވޭ ވާހަކައެއް ކަމަށާއި، ވަރަށް ގިނަ މަސައްކަތް ކުރެވި މިހާރުވެސް ކުރެވެމުން ދާ ކަމަށެވެ.
"ރައީސް މުއިއްޒު ވައުދުވެވަޑައިގެންފައިވާ ބްރިޖް؛ އެ ވެދާނެ އައްޑޫއަށް ބޭނުންވާ ތަރައްޤީ ގެނައުމުގެ "ކެޓަލިސްޓަކަށް". އަޅުގަނޑުމެން މަޝްރޫޢެއް ހިންގާއިރު ސޯޝަލް އަދި އިކޮނޮމިކް ބެނެފިޓްސްތަކެއް ހުންނާނެ. ސީދާ އިކޮނޮމިކް ބެނެފިޓްސް ނުހުރެދާނެ ފެންނަން. އެހެން ނަމަވެސް އޭގެ ސަބަބުން އަންނަ ތަރައްޤީއާއި ކުރިއެރުންތައް ހުންނާނެ " މުއްތަލިބު ވިދާޅުވިއެވެ.
މުއްތަލިބު ވަނީ އައްޑޫ ބްރިޖް މަޝްރޫޢުގެ ވެސް ކުރިއަށް ގެންދާނީ އޭގެ ފައިނޭންޝަލް އަދި ޓެކްނިކަލް ފީޒިބިލިޓީ ހެދިގެން ކަމަށެވެ. އަދި ވަރަށް އަވަހަށް އެކަން ހާވަލު ކުރެވޭނެ ކަމަށް ވިދާޅުވިއެވެ.
މީގެ އިތުރުން މިނިސްޓަރ ވަނީ ސަރުކާރުން ހިންގާ ޢުމްރާނީ ތަރައްޤީގެ ބޮޑެތި ބިޔަ މަޝްރޫޢު ތަކުގެ މައިގަނޑު ދެ ބޭނުމެއް އޮންނަކަން ފާހަގަ ކޮށްފައެވެ. އެއީ އީޤްތިޞާދީ ތަރައްޤީ އާއި އިޖްތިމާޢީ ތަރައްޤީ އެ މަޝްރޫޢުގެ ސަބަބުން އައުން ކަމަށް ވިދާޅުވިއެވެ.