ރާއްޖޭގެ ފެށުމަށް މަސައްކަތް ކުރާ 200 މިލިއަން ރުފިޔާގެ ބޮޑު ވަޤުފް މަޝްރޫޢުއިން އަހަރަކު 30 މިލިއަން ރުފިޔާ ވަޤުފް ފަންޑަށް ވަންނާނެ ކަމަށް އިސްލާމިކް މިނިސްޓަރ ޑރ. ޝަހީމް އަލީ ސައީދު ވިދާޅުވެއްޖެއެވެ.
ރޭ ބޭއްވި "އަހާ" މިނިސްޓަރުންގެ ފޯރަމުގައި ވާހަކަ ދައްކަވަމުން މިނިސްޓަރ ޝަހީމް ވަނީ ރާއްޖޭގައި އަވްޤާފް އިންވެސްޓްމެންޓުތައް ޤާއިމް ކުރުމަށް ނިންމި ފުރަތަމަ ސަރުކާރަކީ ރައީސް ޑރ. މުހައްމަދު މުއިއްޒުގެ ސަރުކާރު ކަމަށް ވިދާޅުވެފައެވެ. އަދި މި ނިޒާމަކީ އިސްލާމީ އިޤްތިޞާދުގެ ވަރަށް މުހިންމު ނިޒާމެއް ކަން ފާހަގަ ޝަހީމް ވަނީ ރާއްޖޭގައި މިހާތަނަށް ޤާއިމް ކުރި ދާރުލް އީމާންގެ މަޝްރޫޢުއިން އަހަރަކު 6 މިލިއަން ރުފިޔާ މިސްކިތު ފަންޑަށް ލިބޭ ކަމަށެވެ.
" މިސިކިތް ފަނޑަށް ފައިސާ ލިބޭ އެހެން ޕްރޮޕަޓީއެއް ރާއްޖެއަކު ނެތް. ރައީސް މުއިއްޒުގެ ސަރުކާރުގެ ކެބިނެޓުން ނިންމެވީ ރާއްޖޭގެ އެންމެ ބޮޑު ވަޤުފް ޕްރޮޖެކްޓް ޤާއިމް ކުރަން. 200 މިލިއަން ރުފިޔާ ޕްރޮޖެކްޓެއް އެ ޕްރޮޖެކްޓަކީ. އެ ޕްރޮޖެކްޓުގެ ޑިޒައިނަށް ގެންނަން ޖެހޭ ކުޑަ ބަދަލެއް އޮތުމާއެކު ބިންގާ އެޅުން ލަސްވެފައި އޮތީ. " ޝަހީމް ވިދާޅުވިއެވެ.
މިނިސްޓަރ ޝަހީމް ވަނީ މިމަޝްރޫޢު ހުޅުމާލޭގައި ހިންގަން ނިންމާފައިވާ މި މަޝްރޫޢު ހިންގުމަށް ބޭނުންވާ ފައިސާ ބީއެމްއެލް އިސްލާމިކް އާއި ވާހަކަ ދައްކައިގެން ހަމަޖެހިފައިވާ ކަމަށް ވިދާޅުވެފައެވެ.
" މި ޕްރޮޕަޓީ ޤާއިމްވީމާ އަހަރަކު 30 މިލިއަން ވަރަކަށް ރުފިޔާ ވަޤުފް ފަންޑަށް ވަދެގެން ދާނެ. މީގެ ނަތީޖާއަކީ ދިވެހި ރާއްޖޭގެ އިސްލާމީ ކަންކަމަށް އޭގެ ހެޔޮ ބަދަލު އައުން. މިހުރި ދަތިތަށް ފިލައި ދިއުން. ކައުންސިލްތަކަށް ހުރި ދަތިތައް ފިލައި ދިއުން. މިސްކިތްތަކަށް ޒީނަތްތެރިކަން އިޔާދަ ކުރެވުން. ސާފުތާހިރުކަން އިޔާދަ ކުރެވުން " މިނިސްޓަރ ވިދާޅުވިއެވެ.
މިމަޝްރޫޢުގެ ފައިދާ ގާތްގަނޑަކަށް 2 އަހަރު ތެރޭ ލިބެން ފަށާނެ ކަމަށް މިނިސްޓަރ ޝަހީމް ވަނީ މީގެ ކުރިން ވިދާޅުވެފައެވެ. އިސްލާމިކް މިނިސްޓްރީން މިހާރު ވަނީ ދެމިހުރި ސަދަގާތެއްގެ ގޮތުގައި ވަގުފު އިމާރާތް އަޅަން ބޭނުންވާ ފަރާތްތަކަށް، ރަށު ވަގުފު، އަތޮޅު ނުވަތަ ސިޓީ ވަގުފު ގާއިމުކުރުމުގެ ފުރުސަތު ހުޅުވައިލައިފަ އެވެ.
އަދި މިފަދަ މަޝްރޫޢު ހިންގުމަށް 80 އަށް ވުރެ ގިނަ ރަށުން ޝައުޤުވެރިކަން ފާޅުކޮށްފައިވާ ކަމަށް މިނިސްޓްރީން ވަނީ ހާމަކޮށްފައެވެ.