ހިތަދޫ ބޮޑު މަގު، ރީތި ފޮޓޯ ކުރިމަތިން ނުރައްކާތެރި އެކްސިޑެންޓެއް ހިގައި ތިން މީހަކު ވަރަށް ބޮޑަށް ޒަހަމްވެއްޖެއެވެ.
އައްޑޫލައިވަށް މައުލޫމާތުލިބިފައިވާ ގޮތުގައި އެއްކޮޅުން ދުއްވާފައި ދިޔަ ސައިކަލް ޖެހި އެކްސިޑެންޓްވި ހާދިސާގައި އެކެއްގެ މޫނު ވަނީ ތާރުގަޑުގައި ޖެހި ޗިސްވެފައިއެވެ. އަދި އެ ސަރަހައްދުގައި ލޭފައިބާފައި ހުއްޓެވެ.
މިހާދިސާ އާއި ގުޅޭ މައުލޫމާތު ހޯދުމަށް އައްޑޫލައިވް ޓީމް ހިތަދޫ ރީޖަނަލް ހޮސްޕިޓަލްގައި ހަރަކާތްތެރިވަމުންދާއިރު މިހާތަނަށް އެނގިފައިވަނީ މީގެ ތެރެއިން އެއް ސައިކަލް ދުވައްވަން ހުރީ އުމުރުން 19 އަހަރުގެ މުހައްމަދު އިރުފާން ކިޔާ ކުއްޖެކެވެ. އަދި އަނެއް ސައިކަލް ދުއްވާފައި ދިޔައީ ސ.ހިތަދޫ މެރީގާރޑަންއާގެ މޫސާ ވަހީދު 21އ.އެވެ.
ހޮސްޕިޓަލްގައި ހުރި އައްޑޫ ލައިވްގެ ރިޕޯޓަރު ބުނީ ހާދިސާ ހިގާފައިވަނީ އިރުފާން ދުއްވާ ދިޔަ ސައިކަލް ބޮޑުމަގުން ޔޫޓާން އެއް ނެގި ވަގުތު މަގުގެ އަނެއްކޮޅުން ދުއްވާއައި ސައިކަލް ކުރިމަތިން ދިޔަ ބަހަކުން އޯވާރޓޭކް ކުރަން އުޅުމުގެ ތެރޭގައި ދެ ސައިކަލް ޖެހިގެންނެވެ.
މިހާދިސާގައި މޫސާ ވަހީދު ދުއްވާފައި ދިޔަ ސައިކަލްގެ ފަހަތުގައި ހުރި މީހާއަށް އަށް ބޮޑު އަނިޔާއެއް ލިބިފައި ނުވާ އިރު މޫސާ ވަހީދު އާއި އިރުފާންގެ ބޯވަނީ ފަޅައިގެން ގޮސްފައިއެވެ.
މިހާދިސާގައި ދެ ސައިކަލަށްވެސް ވަނީ ބޮޑެތި ގެއްލުންތަކެއް ވެފައެވެ. އަދި މިމައްސަލަ މިހާރު ދަނީ މޯލްޑިވްސް ޕޮލިސް ސާވިސް އިން ތަހްޤީޤުކުރަމުންނެވެ.