ރައްޔިތުންގެ މަޖިލީހަށް ވަޑައިގަންނަވަން ކުރީގެ ފޮރިން މިނިސްޓަރު ދުންޔާ މައުމޫން ނެންގެވި ފުރަތަމަ ފިޔަވަޅުން ނާކާމިޔާބީއާ ކުރިމަތިލައްވަން ޖެހިވަޑައިގެންފި އެވެ.
ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނބަލުން ޕީއެންސީ/ޕީޕީއެމްގެ ޓިކެޓްގައި މަޖިލީހަށް ވާދަކުރައްވަން ޕްރައިމަރީ އަށް ނުކުންނެވީ ހުޅުމާލެ ދެކުނު ދާއިރާއަށެވެ. އެކަމަކު އެ ދާއިރާ އިން އިއްޔެ ވޯޓް ދިން މެންބަރުން ދުންޔާ އަށް ބުނީ ނޫނެކޭ އެވެ. މިއީ މަޖިލީހަށް ވަޑައިގަންނަވަން ދުންޔާ ކުރެއްވި ފުރަތަމަ މަސައްކަތުން ނުކުތް ނަތީޖާ އެވެ.
ހުޅުމާލޭ ދެކުނު ދާއިރާގެ ޓިކެޓް ކާމިޔާބުކުރެއްވީ ޒުވާން ބޭފުޅެއް ކަމަށްވާ ޝާނީޒް ހާޝިމް (ޝާންކޮ) އެވެ. އެ ދާއިރާ އަށް ޖުމްލަ ތިން ކެންޑިޑޭޓަކު ވާދަކުރެއްވި އިރު، ދުންޔާ އަށް ލިބިވަޑައިގަތީ ފަހަތުން އެއް ވަނަ އެވެ. އޭނަ އަށް ލިބިވަޑައިގަތީ އެންމެ 70 ވޯޓެވެ. ޕްރައިމަރީ ކާމިޔާބުކުރެއްވި ޝާންކޮ އަށް 240 ވޯޓް ލިބިވަޑައިގަތް އިރު، ދެވަނަ އަށް ދިޔަ ރަހުމަތުﷲ އަޝްރަފަށް 102 ވޯޓް ލިބިވަޑައިގަތެވެ.
އާންމުންގެ ތެރޭގައި މާ ރައްޓެހި ނޫން މޫނުތަކަކާ ޕްރައިމަރީގައި ވާދަކުރައްވައިފެން ދުންޔާ އަށް ލަދުވެތި ބައްޔަކާ ކުރިމަތިލައްވަން ޖެހިވަޑައިގަތް އިރު، އޭނަ ވަރަށް ފޯރީގައި ކެމްޕޭން ކުރެއްވި އެވެ. އެ ކެމްޕޭންގައި ކޮއްކޮ އަދި ކުރިން ދިއްގަރު ދާއިރާގެ މެންބަރުކަން ކުރެއްވި ފާރިސް މައުމޫން ވަރަށް އިސްކޮށް ދުންޔާގެ ކެމްޕޭނުގައި އުޅުއްވި އެވެ.
މިހާރު ޑިފެންސް މިނިސްޓަރުގެ މަގާމުގައު ހުންނެވި ދުންޔާގެ ހަގު ކޮއްކޯފުޅު ގައްސާން މައުމޫނަކީ ވެސް މިނިސްޓަރުކަމަށް ވަޑައިގެންނެވުމުގެ ކުރިން މަޖިލީހުގެ މެންބަރެކެވެ. އޭނަ ތަމްސީލު ކުރެއްވީ ގުރައިދޫ ދާއިރާ އެވެ.
މިދިޔަ އަހަރުގެ ރިޔާސީ އިންތިހާބުގެ ކެމްޕޭންގެ ތެރޭގައި ޕީޕީއެމާ އަލުން ދުންޔާ ގުޅިވަޑައިގަތް އިރު، އޭނަ ވަނީ ކާނަލް މުހައްމަދު ނާޒިމްގެ ޕާޓީ، މޯލްޑިވްސް ނެޝަނަލް ޕާޓީ (އެމްއެންޕީ) ގަ އާއި ކުރީގެ ހޯމް މިނިސްޓަރު އުމަރު ނަސީރާ އެކީ ވެސް ސިޔާސީ މަސައްކަތްތަކެއް ކުރައްވައިފަ އެވެ.
އެކަމަކު ދުންޔާ ފާހަގަކުރެވެނީ ސިޔާސީ ގޮތުން އާންމުންގެ ތެރޭގައި އަދިވެސް އެހާ ބަސްވިކޭ ބޭފުޅެއްގެ ގޮތުގައެއް ނޫނެވެ. އުމުރުން 53 އަހަރުގެ ދުންޔާ އަކީ ފޮރިން މިނިސްޓަރުކަން ކުރެއްވީ 2013-2016 އަށެވެ. އޭގެ ކުރިން ބައްޕާފުޅު މައުމޫންގެ ވެރިކަމުގައި ފޮރިން މިނިސްޓަރުގެ ނައިބުކަމާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ފޮރިން މިނިސްޓްރީގެ ސްޓޭޓް މިނިސްޓަރެއްގެ މަގާމު ދުންޔާ އަދާކުރެއްވި އެވެ.