އިއްޔެ ބޭއްވި ޕީޕީއެމް/ޕީއެންސީގެ ޕްރައިމަރީގައި ފޭދޫ ދެކުނު ދާއިރާގެ ޓިކެޓް ކަށަވަރުވުމާ ގުޅިގެން ވޯޓް ދިން ހުރިހާ އެންމެންނަށް އިބްރާހީމްދީދީ (އައިބީ) ޝުކުރު އަދާކުރައްވައިފި އެވެ.
އޭނަ ސޯޝަލް މީޑިއާގައި އާންމުކުރި ކުރި ބަޔާނެއްގައި ވިދާޅުވީ ޕާޓީގެ މެންބަރުން އޭނަ އަށް ދިން ލޯތްބާއި ކުރި އިތުބާރަށްޓަކައި ޝުކުރު އަދާކުރައްވާ ކަމަށެވެ.
"ފޭދޫ ރައްޔިތުންގެ ޝިކާޔަތުތަކަށް ތަސައްލީއެެއް ހޯދުމުގައި ﷲ ގެ އިރާދަފުޅުން އެންމެ ފިޔަވަޅެއް ވެސް ފަހަތަށް ނުޖެހި އަބަދުގެ މަސައްކަތް ކުރާނެކަމުގެ ޔަގީންކަން އަރުވަން." އައިބީ ވިދާޅުވި އެވެ.
އޭނަ އަކީ ކުރިން ވެސް ފޭދޫ ދާއިރާގެ މެންބަރުކަން ކުރެއްވި ބޭފުޅެކެވެ. އެއީ 18 ވަނަ މަޖިލީހުގަ އެވެ. އައިބީ އަކީ މި ސަރުކާރުގެ ހޯމްލޭންޑް މިނިސްޓަރު އަލީ އިހުސާންގެ ބައްޕަ އެވެ.
އައިބީއާ އެކީ ފޭދޫ ދެކުނު ދާއިރާ އަށް ދެން ވާދަކުރެއްވީ އަބްދުﷲ ރަފީއު (ރަފިއްޓެ) އެވެ. އައިބީ ޕްރައިމަރީ ކާމިޔާބުކުރެއްވީ ވޯޓްލީ މެންބަރުންގެ 52 ޕަސެންޓާ އެކީގަ އެވެ.