ހދ. ހަނިމާދޫ އެއާޕޯޓުން އަލުން އިންޑިއާ އަށް ދަތުރުތައް ފަށަން ނިންމާފައިވާ ކަމަށް ގައުމީ އެއާލައިން މޯލްޑިވިއަން އޮޕަރޭޓްކުރާ އައިލޭންޑް އޭވިއޭޝަން ސާވިސެސް އައިއޭއެސް) ގެ ޑެޕިއުޓީ މެނޭޖިން ޑިރެކްޓަރު އަލީ ސަލީމް ވިދާޅުވެއްޖެ އެވެ.
އެ އެއާޕޯޓްގެ އާ ރަންވޭގެ ފުރަތަމަ 1،200 މީޓަރު މިއަދު ބޭނުން ކުރަން ފެށުމުގެ ގޮތުން ބޭއްވި ރަސްމިއްޔާތުގައި އޭނަ ވިދާޅުވީ އެ އެއާޕޯޓުން ކުރިން އިންޑިއާ އަށް ކުރި ސީދާ ދަތުރުތައް ހުއްޓާލާފައި އޮންނަތާ ގިނަ ދުވަސްތަކެއްވެއްޖެ ކަމަށެވެ. ނަމަވެސް މިހާރު އަމާޒު ހުރީ އާ ރަންވޭގެ އެއްބައި ވެސް ބޭނުން ކުރަންފެށުމާ ގުޅިގެން ލަސްތަކެއް ނުވެ އިންޑިއާ އަށް ދަތުރުތައް ފެށުމަށް ކަމަށެވެ.
އެގޮތުން ކުރިން ޓްރިންވެންޑްރަމަށް ދަތުރު ކުރިޔަސް ހަނިމާދޫ އެއާޕޯޓުން އިންޑިއާ އަށް އަލުން ދަތުރުތައް ފަށާ އިރު، އިންޑިއާގެ އިތުރު ސިޓީތަކަށް ދަތުރު ކުރާނެ ކަމަށް ސަލީމް ވިދާޅުވި އެވެ.
"މޯލްޑިވިއަނުން ފޯރުކޮށް ދޭ ޚިދުމަތްތައް ހަރުދަނާ ކުރުމަށް މި އަންނަނީ މަސައްކަތް ކުރަމުން. އެގޮތުން ޚިދުމަތުގައި މިހާރު ބޭނުންކުރާ ފްލައިޓްތަކަށް ވުރެ ބޮޑެތި ފްލައިޓް ހޯދުމުގެ މަސައްކަތްތައް ވެސް މިއަންނަނީ ކުރަމުން." އޭނަ ވިދާޅުވި އެވެ.
ހަނިމާދޫން އިންޑިއާ އަށް ކުރަމުން އައި ދަތުރުތައް މެޑުކަނޑާލީ އެއާޕޯޓް ތަރައްގީ ކުރަން ނިންމުމާ ގުޅިގެން މިދިޔަ އަހަރުގެ ކުރީކޮޅު އެވެ.