"މަސްވެރިންގެ ކޯޕަރޭޓިވް ސޮސައިޓީ" އެއް އެކުލަވާލަން ސަރުކާރުން ނިންމައިިފި އެވެ.
ރާއްޖޭގެ ހުރިހާ މަސްވެރިން ވެސް ޝާމިލުވާ ގޮތަށް މި ސޮސައިޓީ އެކުލަވާލުމާ ގުޅޭ ގޮތުން ކެބިނެޓްގައި އިއްޔެ މަޝްވަރާ ވެސް ކޮށްފައިވެ އެވެ.
މިކަމާ ބެހޭ ގޮތުން ސަރުކާރުން ބުނެފައި ވަނީ "މަސްވެރިންގެ ކޯޕަރޭޓިވް ސޮސައިޓީ" އެކުލަވާލަން އެންމެ އެކަށޭނަ މޮޑެލަކާ ގުޅޭ ގޮތުން އެހެން ޤައުމުތަކުގެ ތަޖުރިބާ އާއި ކަމާގުޅޭ އިތުރު ދިރާސާތަކުގެ އަލީގައި ކޮންސެޕްޓްތަކެއް އެކުލަވާލާނެ ކަމަށެވެ. އަދި މަސްވެރިންގެ ކޯޕަރޭޓިވް އެކުލަވާލުމުގެ މަސައްކަތް ކުރިއަށް ގެންދާނެ ގޮތުގެ މަގުޗާޓެއް ހަދައި މަސްވެރި މުޖުތަމަޢާ އެކީ އެއްބަސްވުމަކަށް އައުމަށް ވެސް ކެބިނެޓް ބައްދަލުވުމުގައި މަޝްވަރާކުރި އެވެ.
މި ސަރުކާރުން ވަނީ ސަރުކާރުގެ މަސްކުންފުނި މިފްކޯގައި މަސްވެރިންގެ ދައުރު އޮންނަ ގޮތަށް ހަދަން ނިންމައިފަ އެވެ. އެގޮތުން އެ ކުންފުނީގެ ބޯޑްގައި މަސްވެރިންގެ ފަރާތުން ތަމްސީލުކުރާނެ ބަޔަކު ރައީސް އައްޔަން ކުރައްވާނެ އެވެ.
މިފްކޯގެ ބޯޑަށް ކުރިމަތިލާން ފިޝަރީޒް މިނިސްޓްރީން މިދިޔަ މަހުގެ ފަހުކޮޅު ހުޅުވައިލި އެވެ. ކުރިމަތިލާން ދިން ސުންގަޑި ހަމަވީ މި މަހުގެ 11 ގަ އެވެ.