އިހަވަންދިއްޕޮޅު ސްޕެޝަލް އިކޮނޮމިކް ޒޯނެއްގެ ގޮތުގައި ކަނޑައަޅަން ނިންމައިފި އެވެ.
ކެބިނެޓިން އިއްޔެ އެގޮތަށް ނިންމީ އިކޮނޮމިކް މިނިސްޓްރީން ހުށަހެޅި ކަރުދަހާކަށް މަޝްވަރާކުރުމަށް ފަހު އެވެ.
މިކަމާ ބެހޭ ގޮތުން ރައީސް އޮފީހުގެ މިނިސްޓަރު އަބްދުﷲ ނާޒިމް އިއްޔެ ވިދާޅުވީ އިހަވަންދިއްޕޮޅު މަޝްރޫއުގެ މާސްޓަ ޑިވެލޮޕަރުގެ ގޮތުގައި ހަމަޖެއްސީ، މި ސަރުކާރުން އަލަށް އުފެއްދި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ކަމަށެވެ. އޭނަ ވިދާޅުވި ގޮތުގައި،އެ މަޝްރޫއުގެ މާސްޓަ ޑިވެލޮޕަރުގެ ގޮތުގައި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ހަމަޖެއްސުމާ އެކު އެ ސަރަހައްދުގެ ޑިވެލޮޕްމަންޓް ރައިޓްސް އެ ކުންފުންޏަށް ވަނީ ދީފަ އެވެ.
ނާޒިމު ވިދާޅުވީ މޯލްޑިވްސް އިކޮނޮމިކް ގޭޓްވޭ އަކީ މެރިޓައިމް ހިދުމަތްތަކާއި އިކޮނޮމިކް ސެކިއުރިޓީއަށް އަމާޒުކޮށްގެން، ރިއަލް އެސްޓޭޓް، ޓޫރިޒަމް އަދި އެހެނިހެން ވިޔަފާރި ހިމެނޭ ގޮތަށް ހިންގާ އިންޓަގްރޭޓަޑް މަޝްރޫއެކެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް އިހަވަންދިއްޕޮޅުގައި އެފަދަ މަޝްރޫއެއް "އައިހަވަން" ގެ ނަމުގައި ހިންގަން އުޅުނެވެ. އެ މަޝްރޫއު އިއުލާންކުރީ 2014 ގައި ސިންގަޕޫރުގައި ބޭއްވި އިންވެސްޓްމެންޓް ފޯރަމްގަ އެވެ. އެގޮތުން އޭރު
މަޝްރޫއުގެ ތެރޭގައި ބަނދަރަކާއި އެއާޕޯޓެއްގެ އިތުރުން ބަންކަރިންގެ ހިދުމަތާއި ޝޮޕިން މޯލްތަކުގެ އިތުރުން ރިއަލް އެސްޓޭޓާއި ޓޫރިސްޓު ރިސޯޓު ތަރައްގީކުރަން ހިމެނި އެވެ.
އިހަވަންދިއްޕޮޅުގައި ބަންކަރިން ފެސިލިޓީއެއް ހަދަން މިދިޔަ ސަރުކާރުގައި އެސްޓީއޯ އިން މެދުއިރުމަތީގެ ކުންފުންޏެއް ކަމަށްވާ ގަތަރުގެ އާބަކޮން ޓްރޭޑިންގް އެންޑް ކޮންޓްރެކްޓިންގްއާ އެކު އެއްބަސްވުމެއްގައި ސޮއިކޮށްފައިވެ އެވެ.