ފުށިދިއްގަރު ފަޅު ހިއްކައިގެން ތަރައްގީކުރަން ނިންމާފައިވާ ޒަމާނީ ސިޓީ، ރަސްމާލޭގައި 15،000 ހައުސިން ޔުނިޓު އެޅުމަށް ޗައިނާގެ ކުންފުންޏަކުން ހުށަހަޅައިފި އެވެ.
ރައީސް އޮފީހުގެ ޕޮލިސީ ސެކްރެޓަރީ އަބްދުﷲ ނާޒިމް އިއްޔެ ވިދާޅުވީ އެކަން ހުށަހެޅީ ޗައިނާ ސްޓޭޓް ކޮންސްޓްރަކްޝަން އިންޖީނިއަރިން ކޯޕަރޭޝަން (ސީއެސްސީއީސީ) އިން ކަމަށެވެ. އެ ކުންފުންޏަކީ ހުޅުމާލޭ ދެވަނަ ފިޔަވަހީގެ ހިޔާ ފްލެޓްތައް ވެސް ހެދި ކުންފުންޏެވެ.
ނާޒިމް ވިދާޅުވީ ސީއެސްސީއީސީން ހުށަހެޅި ޕްރޮޕޯސަލާ ގުޅޭ ގޮތުން ހައުސިން މިނިސްޓްރީ އާއި އިންފްރަސްޓްރަކްޗާ މިނިސްޓްރީ ގުޅިގެން ފްލެޓް މަޝްރޫއަށް ހިނގާނެ ހަރަދާއި އޭގެ ފެންވަރާ ގުޅޭ ގޮތުން އިތުރަށް އިކޮނޮމިކް ކައުންސިލްގައި މަޝްވަރާކުރަން ނިންމާފައިވާ ކަމަށެވެ.
ފުށިދިއްގަރުފަޅު ހިއްކަމުން އަންނަ އިރު، ރަސްމާލެ އަށް 1،153 ހެކްޓަރުގެ ބިން ހަމަޖައްސާފައިވެ އެވެ. އެގޮތުން މިހާތަނަށް ވަނީ 10 ހެކްޓަރު ހިއްކައިފަ އެވެ. އެ ތަން ހިއްކަން ފެށީ މިދިޔަ މަހުގެ 18 ގަ އެވެ. ހިއްކުމުގެ މަސައްކަތް ކުރަނީ ސްރީ ލަންކާގެ ކުންފުންޏެއް ކަމަށްވާ ސިވިލް މެރީން ކޮންސްޓްރަކްޝަން ކޮމްޕެނީ (ސީއެމްސީސީ) އިންނެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި ސަރުކާރުން އެއްވެސް ހަރަދެއް ނުކުރާ ގޮތަށް ހިންގަމުން އަންނަ ހިއްކުމުގެ މަޝްރޫއުގެ ތެރެއިން ރަސްމާލޭގައި ގޯއްޗާއި ފްލެޓް އެކުލެވޭ ގޮތަށް ރަސްމާލޭގައި 65،000 ހައުސިން މަޝްރޫއު ކުރިއަށްގެން ދާނެ އެވެ.
ސަރުކާރުން ވަނީ ރަސްމާލެ އާއި މާލެއާ ދެމެދު ކަނޑު އަޑީގެ ޓަނަލެއް ވެސް ހަދާނެކަން އިއުލާންކޮށްފަ އެވެ.