ވަގު ތައްގަނޑެއް ޖަހައިގެން ތައުލީމީ ސެޓްފިކެޓްތަކެއް ބޭނުން ކުރަމުންދާތީ ސަމާލުވުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިލްތިމާސްކޮށްފި އެވެ.
އެތަނުން ނެރުނު ބަޔާނެއްގައި ރާއްޖޭގައި ރަޖިސްޓަރީކޮށްގެން ހިންގަމުންދާ މަތީ ތައުލީމުދޭ މަރުކަޒުތަކުން ކުރިއަށް ގެންދާ ތައުލީމާއި ތަމްރީން ޕްރޮގްރާމުތައް ފުރިހަމަކުރުމުން ދޭ ލޯކަލް ސަނަދުތަކުގައި ކުރިން ޖަހަމުން ދިޔަ "ރިކޮގްނިޝަން" ތައްގަނޑު ޖެހުން ސެޕްޓެމްބަރު 1، 2016 ގައި ހުއްޓާލާފައިވާ ކަމަށެވެ. ނަމަވެސް އެ އޮތޯރިޓީގެ ފޭކް "ރިކޮގްނިޝަން" ތައްގަނޑު ބޭނުންކޮށް އަދި އެތަނުގެ މުވައްޒަފެއްގެ ސޮއި ފޯޖްކޮށްފައިވާ ސަނަދުތަކެއް ބަޔަކު ބޭނުން ކުރަމުންދާކަން ސަމާލުކަމަށް އައިސްފައިވާ ކަމަށް އެމްކިއުއޭ އިން ބުންޏެވެ. އެހެންވެ ކަންކަމަކީ އެ އޮތޯރިޓީގެ މުވައްޒަފުންގެ ހައްގަށް ލިބޭނެ އުނިކަމެއް ކަމަށާއި އަދި މިއީ މަތީ ތައުލީމާއި ތަމްރީންގެ ފެންވަރު ކަށަވަރު ކުރުމަށްޓަކައި ކުރަމުން އަންނަ މަސައްކަތާ މެދު އާންމުންގެ މެދުގައި ސުވާލު އުފެދުމަށް މެދުވެރިވާ ކަމެއް ކަމަށް ބުންޏެވެ.
"މިކަން މިއޮތޯރިޓީން ހަރުކަށި އިބާރާތުން ކުށްވެރިކުރަން. އަދި މި މައްސަލަ ބައްލަވައިދެއްވުމަށް އެދި ކަމާ ގުޅުންހުރި ފަރާތްތަކަށް ހުށަހެޅުމުގެ މަސައްކަތް ފަށާފައިވާ ވާހަކަ ވެސް ދަންނަވަން." ބަޔާނުގައި ބުންޏެވެ.
އެމްކިއޭއޭ އިން ބުނީ ފޭކް ތައްގަނޑު މައްސަލައިގައި ކަމާ ގުޅުންހުރި ފަރާތްތަކާ އެކީ މަޝްވަރާތަކެއް ވެސް ކުރިއަށްދާ ކަމަށެވެ. އަދި މިފަދަ ކަންކަމަށް މަތީ ތައުލީމް ފޯރުކޮށްދޭ އިދާރާތަކުންނާއި ވަޒީފާ ދޭ އިދާރާތަކުން ސަމާލުވުމަށް ވެސް އެދިފައިވެ އެވެ.