މޯލްޑިވްސް އިކޮނޮމިކް ގޭޓްވޭގެ މަޝްރޫއަށް ބޭނުންވާ ބިންހިއްކުމުގެ މަސައްކަތް ފެށުމަށް ތައްޔާރުވަމުން އަންނަ ކަމަށް އިކޮނޮމިކް މިނިސްޓަރު މުގައްމަދު ސަޢީދު ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި މިނިސްޓަރު ވިދާޅުވީ މޯލްޑިވްސް އިކޮނޮމިކް ގޭޓްވޭގެ މަޝްރޫއަށް ވީ އެންމެ އަވަހަކަށް ބިން ހިއްކަން ސަރުކާރުން ބޭނުންވާ ކަމަށެވެ.
"ރައީސް ޑރ. މުޢިއްޒުގެ ތަރައްގީގެ ދުވެލި ބާރުވާނެ." ސައީދު ވިދާޅުވި އެވެ.
މި މަޝްރޫއުއަކީ މެރިޓައިމް ޚިދުމަތްތަކާ އިކޮނޮމިކް ސެކިއުރިޓީއަށް ފޯކަސްކޮށްގެން، ރިއަލް އެސްޓޭޓް، ޓޫރިޒަމާއި އެހެނިހެން ވިޔަފާރިތައް ހިމެނޭ ގޮތަށް އިހަވަންދިއްޕޮޅުގައި ކުރިއަށްގެންދާ މަޝްރޫއެކެވެ.
މަޝްރޫއުގެ މާސްޓަ ޑިވެލޮޕަރެއްގެ ގޮތުގައި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ހަމަޖެއްސެމަށް ވެސް ކެބިނެޓުން މި ހަފުތާގައި އޮތީ ނިންމައިފަ އެވެ. އަދި އިހަވަންދިއްޕޮޅުން މި މަޝްރޫއުއަށް ކަނޑައަޅާ ސަރަހައްދުގެ ޑިވެލޮޕްމަންޓް ރައިޓްސް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑަށް ދީފައިވެ އެވެ.
މީގެ އިތުރުން މަޝްރޫއު ހިންގަން ހަމަޖެހިފައިވާ ސަރަހައްދު ވަނީ ސްޕެޝަލް އިކޮނޮމިކް ޒޯން އެސްއީޒެޑް) ގެ ގޮތުގައި ކަނޑައަޅައިފަ އެވެ.