ކުރިއަށް އޮތް ފަސް އަހަރަށް ފުލުހުންގެ ޚިދުމަތުގެ ސްޓްރެޓެޖިކް ޕްލޭން އެކުލަވައިލުމަށް ހިޔާލު ހޯދުމަށް ނ. މަނަދޫގައި ކޮމިއުނިޓީ ފޯރަމެއް ބާއްވައިފިއެވެ.
މިއީ ސްޓްރެޓެޖިކް ޕްލޭން އެކުލަވައިލުމަށް ރައްޔިތުންނާއި މުއައްސަސާތަކުގެ ހިޔާލު ހޯދައި މަޝްވަރާކުރުމަށް ބާއްވާ ފޯރަމްތަކުގެ ތެރެއިން ބޭއްވި ފުރަތަމަ ފޯރަމެވެ.
ފޯރަމްގައި ނ. އަތޮޅާއި ޅ. އަތޮޅުގެ ރަށްރަށުގެ ކައުންސިލުތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ މެންބަރުންނާއި ސަރުކާރުގެ އެހެނިހެން އިދާރާތަކާއި އެ ދެއަތޮޅުގެ ރަށްރަށުގައި ހަރަކާތްތެރިވާ ޖަމުއިއްޔާތަކާއި ވިޔަފާރިވެރިންނާއި ރަށްރަށުގެ ކަމުވޮށިގެންވާ މީހުން ހިމެނޭހެން 45 މީހަކު ބައިވެރިވި އެވެ.
ފޯރަމްގައި، މުޖުތަމައުގައި ހުރި ކަންބޮޑުވުންތަކާއި މައްސަލަތަކާ މެދު މަޝްވަރާކުރުމާއި، މުޖުތަމައު އިން އިސްކަންދޭން ޖެހޭ ކަންކަން ފާހަގަކޮށް ފުލުހުންގެ ޚިދުމަތް ދިނުމުގައި ހުރި ގޮންޖެހުންތައް ދެނެގަނެ، ފުލުހުންނާއި ރައްޔިތުންގެ ގުޅުން ރަނގަޅުކޮށް އިތުބާރު އުފެއްދުމަށްޓަކައި ދެފަރާތް ގުޅިގެން ސްޓްރެޓެޖީ އެކުލަވައިލުމުގެ މަސައްކަތްކޮށްފައިވެ އެވެ.
މީގެ އިތުރުން، ފުލުހުންގެ ޚިދުމަތް ރައްޔިތުންނާ ގާތުން ފޯރުކޮށް ދިނުމަށްޓަކައި ގާއިމުވެފައިހުރި އުސޫލުތަކާއި ސިޔާސަތުތަކާ އަދި ކުރެވެމުންދާ މަސައްކަތްތަކާ ގުޅޭ ގޮތުން ފޯރަމްގައި މައުލޫމާތު ދީފައިވެ އެވެ.