ރާއްޖެ އިން މިހާރު އަމާޒު ހިފާފައި ހުރީ އަހަރު ނިމުމުގެ ކުރިން މަދުވެގެން 2.3 މިލިއަން ޓޫރިސްޓުން ގެނައުން ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ޔޫތު މިނިސްޓްރީގެ "ޔޫތު ހެކަތަން" ފެށުމަށް މިއަދު ރަސްމިއްޔާތުގައި އޭނަ ވިދާޅުވީ ކުރިން އަމާޒަކީ 2 މިލިއަން ޓޫރިސްޓުން ކަމަށެވެ. ނަމަވެސް ރާއްޖެ މާކެޓް ކުރަން މިހާރު އެމްއެމްޕީއާރުސީއާ އެކީ ކުރެވެމުން އަންނަ މަސައްކަތާ އެކީ އެ އަދަދު 2.3 މިލިއަނަށް މަތިކޮށްފައިވާ ކަމަށް ވިދާޅުވި އެވެ.
"ޗައިނާ އަދި އިންޑިއަން މާކެޓު އެ ހުރިވަރުގައި ހިފެހެއްޓިއްޖެކަމަށްވާ ނަމަ އަޅުގަނޑަށް ފެނޭ ގާތްގަނޑަކަށް ޓޫރިސްޓު އެރައިވަލް މި އަހަރު ނިންމާލެވިދާނެ ކަމަށް 2.3 މިލިއަންގައި،" ފައިސަލް ވިދާޅުވި އެވެ. "އެހެންވެއްޖެ ކަމަށް ވާނަމަ އެއީ ވަރަށް ބޮޑު ކުރިއެރުމަކަށްވާނެ. އެކަމުގައި އަޅުގަނޑުމެން މި އަންނަނީ މަސައްކަތްތަކެއް ކުރަމުން."
މިނިސްޓަރު ވިދާޅުވީ ރާއްޖޭގެ ޓޫރިޒަމް ކުރިއަރުވަން ހާއްސަކޮށްގެން ދުނިޔޭގެ މަގުބޫލުކަން ވެސް ހޯދޭނެ އެޕްލިކޭޝަނެއް ވަރަށް އަވަހަށް ތައާރަފު ވެސް ކުރެވޭނެކަމުގެ އުންމީދު ބޮޑު ކަމަށެވެ.
އެމްއެމްޕީއާރްސީން އަންނަނީ އެކިއެކި ފެއާތަކުގައި ރާއްހެ ޕްރޮމޯޓްކޮށް، އިޝްތިހާރު ކުރަން ގިނަ މަސައްކަތްތަކެއް ކުރަމުންނެވެ.
މިނިސްޓަރު ވިދާޅުވީ މިހާރަށް ވުރެ ބޮޑަށް ރާއްޖެ އިޝްތިހާރުކޮށް ޓޫރިޒަމް ސިނާއަތަށް ބޮޑެތި ކުރިއެރުންތަކެއް އަންނާނެ ކަމަށް ވަރަށް ބޮޑަށް އުންމީދު ކުރެވޭ ކަމަށެވެ.
މިދިޔަ އަހަރު ރާއްޖެ އަށް 1.6 މިލިއަނަށް ވުރެ ގިނަ ޓޫރިސްޓުން އަ އެވެ.