މި އަހަރުން ފެށިގެން ގްރޭޑު އެކަކުން ޖާގަ ދޭ އުމުރާ ފުރަ އަށް ބަދަލެއް ގެންނަން އެޑިއުކޭޝަން މިނިސްޓްރީންމ ނިންމައިފި އެވެ.
އެ މިނިސްޓްރީން ނެރުނު ސާކިއުލާއެއްގައި މި އަހަރުގެ މެއި 26 ގައި ދިރާސީ އާ އަހަރު ފަށާ އިރު ގްރޭޑް 1 އިން ޖާގަ ދޭނީ މިދިޔަ ޑިސެމްބަރަށް ހަ އަހަރު ފުރި، ހަތް އަހަރު ނުފުރޭ ދަރިވަރުންނަށް ކަމަށެވެ. ކުރިން ގްރޭޑު 1 އިން ކުރިން ޖާގަ ދެނީ އެ އަހަރެއްގެ ޖެނުއަރީ 1 އަށް ހަ އަހަރު ފުރި ހަތް އަހަރު ނުފުރޭ ދަރިވަރުންނަށެވެ.
ނަމަވެސް ދިރާސީ އަހަރު އޮގަސްޓުގައި ފަށާގޮތަށް 2021 ގައި ބަދަލުކުރުމުން ފާއިތުވި ދެ އަހަރު، ގްރޭޑް 1 އަށް ވެއްދީ ޑިސެމްބަރުގެ ނިޔަލަށް ހަތް އަހަރު ފުރިފައިވާ ދަރިވަރުންނެވެ.
* ބޭބީ ނާސަރީ: 2023 ޑިސެމްބަރު 31 އަށް 2 އަހަރު ފުރި 3 އަހަރު ނުވާ
* ނާސަރީ: 2023 ޑިސެމްބަރު 31 އަށް 3 އަހަރު ފުރި 4 އަހަރު ނުވާ
* އެލްކޭޖީ: 2023 ޑިސެމްބަރު 31 އަށް 4 އަހަރު ފުރި 5 އަހަރު ނުވާ
* ޔޫކޭޖީ: 2023 ޑިސެމްބަރު 31 އަށް 5 އަހަރު ފުރި 6 އަހަރު ނުވާ
މިނިސްޓްރީގެ ސާކިއުލާގައި ބުނީ އެލްކޭޖީއަށް ދަރިވަރުން ވެއްދުމުގައި، ހަތަރު އަހަރު ފުރިހަމަވެފައި ވޭތޯ ބަލާނީ، ދިރާސީ އަހަރަށް ދަރިވަރުން ވެއްދުމަށް އުމުރު ހަމަކުރުމަށް ކަނޑައަޅާފައިވާ އެންމެ ފަހު ދުވަހަށް ހަތަރު އަހަރު ފުރިހަމަ ވާ ނަމަ ކަމަށެވެ. އަދި ދިރާސީ އަހަރު ފެށޭ ފަހުން ހަތަރު އަހަރު ވެފައިވާ ދަރިވަރުން، ހިނގަމުންދާ ދިރާސީ އަހަރެއްގެ ތެރޭގައި އެލްކޭޖީ އަށް ނުވައްދާނެ ކަމަށާއި ވަދެވޭނީ މިދިޔަ ޑިސެމްބަރަށް ހަތަރު އަހަރު ފުރިފައިވާ ނަމަ ކަމަށް ވެސް ބުންޏެވެ.
އެކަމަކު މި އަހަރުގެ މާޗްގެ ނިޔަލަށް ހަތަރު އަހަރު ފުރޭ ކުދިންގެ ބެލެނިވެރިޔާ އެދިއްޖެ ނަމަ އެ އެލްކޭޖީއަށް ވަނުމުގެ ފުރުސަތު ދޭނެ ކަމަށް މިނިސްޓްރީން ބުންޏެވެ.
މިނިސްޓްރީން އެއްވެސް ދަރިވަރަކު އެއް ގްރޭޑުގައި ރިޕީޓު ނުކުރާނެ ކަމަށާއި ހާއްސަ ހާލަތެއް ނުވަތަ މަގުބޫލު އުޒުރެއް އޮތް ނަމަ މިހާރު ކިޔަވަމުން އަންނަ ގްރޭޑްގައި ރިޕީޓް ކުރުމަށް ބެލެނިވެރިޔާ އެދިއްޖެ ނަމަ އެ ފުރުސަތު ދޭނެ ކަމަށެވެ. އަދި
އެ ފަދަ ހާލަތެއްގައި ވެސް ދަރިވަރަކު ރިޕީޓް ކުރެވޭނީ ހުށަހަޅާފައިވާ ލިޔުންތަކަށް ބަލައި، މިނިސްޓްރީން ލިޔުމުން ހުއްދަ ލިބުމުން ކަމަށް ވެސް އެ ސާކިއުލާގައި ބުންޏެވެ.