ޕްރޮސެކިއުޓަ ޖެނެރަލް ހުސައިން ޝަމީމަށް މިއަދު ހަމަލާދިން މީހުން ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ބުނެފި އެވެ.
މިއަދު ހަވީރު ބޭއްވި ނޫން ކޮންފަރެންސްގައި ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ސަބް އިންސްޕެކްޓަރު އަހުމަދު ނާފިޒު ވިދާޅުވީ،ޝަމީމަށް ދިން ހަމަލާގެ މައްސަލަ ތަހުގީގުކޮށް އެމައްސަލައިގެ އެންމެ ފުނަށް ދިއުމަށް ފުލުހުން މަސައްކަތް ކުރާނެ ކަމަށެވެ. އެގޮތުން މިހާރު ވެސް އެ ހާދިސާގެ ތަހުގީގު ފަށައި ހަމަލާދިން މީހުން ހޯދުމުގެ މަސައްކަތް ފުލުހުން ކުރަމުން އަންނަ ކަމަށް ވިދާޅުވި އެވެ.
ކަސްރަތަށް ނުކުމެ ވަޑައިގެން އުޅުއްވަނިކޮށް މިއަދުގެ ވަރަށް ހެނދުނުގެ ވަގުތެއްގައި ޝަމީމަށް މަރުތޭލަކުން ހަމަލާދިނީ ސައިކަލެއްގައި ދިޔަ ދެ މީހެކެވެ. މި ހާދިސާ ހިނގީ ނޫރު މިސްކިތް ކައިރީގަ އެވެ.
ހަމަލާގައި ޝަމީމު ޒަހަމްވެ، އޭޑީކޭގައި ފަރުވާ ދީފައިވެ އެވެ.