އެމްޑީޕީ އާއި ޖުމްހޫރީ ޕާޓީގެ ކުރީގެ ރައީސް ޑރ. އިބްރާހިމް ދީދީ (ޑރ. ޑީޑީ) މިއަދު ހައްޔަރުކޮށްފި އެވެ.
އޭނާ ހައްޔަރު ކުރީ ކޯޓް އަމުރެއްގެ ދަށުން މިއަދު ހަވީރު 4:00 ޖަހަން އުޅެނިކޮށެވެ.
ފުލުހުން ބުނީ ޑރ. ޑީޑީ ހައްޔަރު ކުރީ ފުލުހުން ބަލަމުންދާ މައްސަލައަކާ ގުޅިގެން ކަމަށެވެ. އެކަމަކު އިތުރު ތަފުސީލެއް ފުލުހުން ނުދެ އެވެ.
އެމްޑީޕީ އާއި ޖޭޕީން އިންތިޒާމްކޮށްގެން މިދިޔަ މަހުގެ 27 ވަނަ ދުވަހު ބޭއްވި ބޮޑު އެއްވުމުގެ ފަހުން ކުރިއަށް ދިޔަ މުޒާހަރާތަކުގައި ބައިވެރިވުމާ ގުޅިގެން އެރޭ ދީދީ ހައްޔަރުކުރުމަށް ފަހު ދޫކޮށްލީ 10 ދުވަސް ފަހުންނެވެ.
ކޯޓުން އޭނާ ދޫކޮށްލީ 30 ދުވަހަށް މުޒާހަރާތަކަށް ނުދިއުމަށް ޝަރުތުކޮށްފަ އެވެ.
އެކަމަކު ޑރ. ޑީޑީ ރޭ ރާއްޖެ ޓީވީގައި ވިދާޅުވީ ހައްޔަރު ކުރިޔަސް މައްސަލައެއް ނެތް ކަމަށާއި މަގުތަކުގައި ބާއްވާ އެއްވުންތަކަށް ނިކުންނަވާނެ ކަމަށެވެ.
އެކަމަކު ކޯޓުން ދިން މުއްދަތު ހަަމަނުވަނީސް މިދިޔަ ހޯމަ ދުވަހުގެ ރޭ އިދިކޮޅު ފަރާތްތަކުން ބޭއްވި އެއްވުމުގައި ދީދީ ވަނީ ބައިވެރިވެފަ އެވެ. އަދި އެރޭ ފުލުހުންނާ ކޯޓަށް ގޮންޖައްސަވަމުން ދީދީ ވިދާޅުވީ މުޒާހަރާތަކަށް ނުދިއުމަށް ކޯޓަށް ޝަރުތު ނުކުރެވޭނެ ކަމަށެވެ. އަދި "ނިކަން ހައްޔަރުކޮށްލަ ބަލާށޭ" ވިދާޅުވެ އެރޭ ދީދީ ވަނީ ވާހަކަ ދައްކަވާފަ އެވެ. އަދި އޭނާ ހައްޔަރުކުރި މައްސަލަ ބައިނަލްއަގްވާމީ ކޯޓުތަކަށް ހުށަހަޅާނެ ކަމުގައިވެސް ވިދާޅުވި އެވެ.