ޕްރޮސެކިއުޓަ ޖެނެރަލް ހުސައިން ޝަމީމަށް ހަމަލާ ދިން މީހުން ހޯދުމުގެ ގާބިލުކަން ފުލުހުންގެ ހުންނާނެ ކަމަށް ކުރީގެ ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި އޭނަ ވިދާޅުވީ ޕީޖީ އަށް ހަމަލާ ދިން މީހުންނާއި އެ ނޫން ވެސް އެފަދަ ހަމަލާތައް ދޭ މީހުން ހޯދައި، ގާނޫނުގައިވާ ގޮތުގެ މަތިން ފިޔަވަޅު އެޅުމުގެ ފުރިހަމަ ގާބިލުކަން ދިވެހި ފުލުހުންގެ ޚިދުމަތުގައި މާ ރަނގަޅަށް ވެސް ހުންނާނެ ކަމަށެވެ.
"އަދި އެކަން އެގޮތަށް ކުރާނެކަމުގެ ފުރިހަމަ ޔަގީންކަން އެ މުއައްސަސާއާ މެދު އެބައޮތް." ހަމީދު ވިދާޅުވި އެވެ.
ޖިނާއީ ޢަދުލުގެ ނިޒާމުގެ މައި އެއް މުއައްސަސާގެ ލީޑަރަށް މިއަދު ދިން ހަމަލާ ކުށްވެރިކުރަން. އެ ހަމަލާ އަދި އެނޫންވެސް އެފަދަ ހަމަލާތައް ދޭ ފަރާތްތައް ހޯދައި، ގާނޫނުގައިވާ ގޮތުގެ މަތިން ފިޔަވަޅު އެޅުމުގެ ފުރިހަމަ ގާބިލުކަން ދިވެހި ފުލުހުންގެ ޚިދުމަތުގައި މާރަނގަޅަށްވެސް ހުންނާނެ.…
— Mohamed Hameed (@M_Hameedh) January 31, 2024
އޭނަ ވަނީ ޕީޖީ އަށް ދިން ހަމަލާ ކުށްވެރި ވެސް ކުރައްވައިފަ އެވެ.
ޕީޖީ ޝަމީމަށް އިއްޔެގެ ވަރަށް ހެނދުނުގެ ވަގުތެއްގައި މަރުތޭލަކުން މަގުމަތިން ހަމަލާ ދިނީ ކަސްރަތަށް ނުކުމެ އުޅެނިކޮށް، ނޫރު މިސްކިތް ކައިރިންނެވެ. އެ ހަމަލާގައި އޭނަ އަށް ލިބުނު އަނިޔާކަށް އޭޑީކޭގައި ފަރުވާ ވެސް ދިނެވެ.
ޕީޖީ އަށް ހަމަލާދީ ސައިކަލެއްގައި ދިޔަ ދެ މީހެކެވެ. ފުލުހުން އިއްޔެ ހަވީރު ބޭއްވި ނޫސް ކޮންފަރެންސެއްގައި ބުނެފައި ވަނީ ހަމަލާ ދިން މީހުން ހޯދަމުން އަންނަ ކަމަށާއި އެ މައްސަލައިގެ ތަހުގީގު ކުރިއަށްދާ ކަމަށެވެ.