ޓެރަރިޒަމްގެ ކުށް ސާބިތުވެ 13 އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ދިފާއުގައި އެމްޑީޕީން ހިންގާ ހަރަކާތްތަކުގެ ތެރެއިން މިއަދު ހަވީރު މާލޭގައި ބޭއްވި ކާޑު ތައްޔާރު ކުރުމުގެ ޕްރޮގްރާމްގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް (ރޮޒޭ) ދެ ދަރިން ތައްޔާރު ކުރި ކާޑުތައް ރޮޒޭ ޓްވިޓާގައި ޕޯސްޓްކޮށްފި އެވެ.
އެ ކާޑުތަކުގެ ފޮޓޯ އާ އެކު ރޮޒޭ ކުރެއްވި ޓްވީޓެއްގައި ވިދާޅުވީ ދެ ދަރިން ކަމަަށްވާ ޒައިން ނާޝިޒާއި ޒައިނާ ނާޝިޒް ކުރި މަސައްކަތާ ދޭތެރޭ ފަހުރުވެރިވާ ކަމަށެވެ.
އެމްޑީޕީން މިއަދު ރާޅުގަނޑު ސަރަހައްދުގައި ބޭއްވި ކާޑު ތައްޔާރު ކުރުމުގެ އިވެންޓްގައި އެ ޕާޓީގެ ގިނަ އަދަދެއްގެ މެމްބަރުން ކުދިންނާ އެކު ބައިވެރިވެފައިވެ އެވެ.
ނަޝީދަށް ހުކުމްކޮށްފައި ވަނީ ބޭއިންސާފުން ކަމަށް ބުނެ، އެ މަނިކުފާން ދޫކޮށްލަން ދެން ދަރިން ސްކޫލަށް ނުފޮނުވުމަށާއި ވަޒީފާތަކަށް މީހުން ނުނިކުތުމަށް ވެސް ގޮވާލައްވާފައިވާ އަދި ދަރިން ސިޔާސީ ހަރަކާތްތަަކަށް ނެރެމުންދާ ރޮޒޭއަކީ މިހާރު އެމްޑީޕީގެ ސިޔާސީ ހަރަކާތްތަކުގައި އެންމެ އަޑު ގަދަ އެކެކެވެ.
އެކަމަކު ކުރިން އޭނާއަކީ ނަޝީދަށް ވަރަށް ބޮޑަށް ފާޑު ވިދާޅުވެފައިވާ މީހެކެވެ.