މާޗް މަހު ބާއްވާ ރައްޔިތުންގެ މަޖިލިސް އިންތިހާބުގައި ބޭރުގެ ހަ ގައުމެއްގައި ވޯޓްފޮށި ބަހައްޓަން ނިންމައިފި އެވެ.
އިލެކްޝަން ކޮމިޝަން (އީސީ) އިން ބުނީ ވޯޓްފޮށި ބަހައްޓަން ނިންމީ އިންޑިއާގެ ޓްރިވަންޑްރަމާއި މެލޭޝިއާގެ ކުއަލަލަމްޕޫރާއި ސްރީ ލަންކާގެ ކޮލަމްބޯ އާއި ތައިލެންޑްގެ ބެންކޮކާއި އިނގިރޭސިވިލާތުގެ ލަންޑަންގެ އިތުރުން ދުބާއީގައި ކަމަށެވެ.
މީގެ އިތުރުން މި ފަހަރު ވޯޓްފޮށި ބަހައްޓަން ނިންމާފައި ވަނީ ޖުމްލަ 37 ރިސޯޓެއްގަ އެވެ.
އީސީން ބުނީ ރަޖިސްޓްރީވެފައިވާ ރަށް ނޫން ތަނެއްގައި ވޯޓުލާ ނަމަ މިއަދުން ފެށިގެން މި މަހުގެ 4 އާ ހަމައަށް އެކަމަށް ރީރެޖިސްޓޭޝަންގެ ފުރުސަތު އޮންނާނެ ކަމަށެވެ. އެގޮތުން ޕޯޓަލް މެދުވެރިކޮށް އޮންލައިންކޮށް ފޯމު ހުށަހެޅޭނެ އެވެ.
މަޖިލިސް އިންތިހާބު ބާއްވަން ހަމަޖެހިފައި ވަނީ މާޗް 17 ގަ އެވެ. މި އިންތިހާބުގައި ވާދަކުރަން ބޭނުންވާ މީހުންނަށް އެކަމަށް އެދި ހުށަހެޅުމުގެ ފުރުސަތު މިދިޔަ މަހުގެ 30 އިން ފެށިގެން މި މަހުގެ 14 އާ ހަމައަށް ވަނީ ހުޅުވާލައިފަ އެވެ.
ވިހި ވަނަ މަޖިލީހަށް ޖުމްލަ 93 މެންބަރުން އިންތިހާބު ކުރާނެ އެވެ.