މި މަހު އައްޑޫގައި ފަށަން ނިންމާފައިވާ އިންޓަ-ސްކޫލް އެތުލެޓިކްސް މީޓަށްވަމުން އަންނަ ތައްޔާރީތަކުގެ ތެރެއިން އައްޑޫ ސާފުކުރުމުގެ ބޮޑު ޕްރޮގްރާމެއް އަންނަ ހޮނިހިރު ދުވަހު ހިންގަން ނިންމައިފި އެވެ.
ކައުންސިލުން އިންތިޒާމުކޮށްގެން ބާއްވާ މި ހަރަކާތުގެ ތެރެއިން ހުރިހާ އަވަށެއް ސާފުކުރަން ހަމަޖެހިފައިވެ އެވެ. އެގޮތުން ހޮނިހިރު ދުވަހުގެ ފަތިހު 5:30 ގައި ފަށާ ސާފުކުރުމުގެ ޕްރޮގްރާމްގައި ހިތަދޫގެ މައިގަނޑު ހަ ސަރަހައްދެއް ސާފުކުރަން ނިންމާފައިވެ އެވެ. އެއީ މުބާރާތުގެ އިވެންޓްތައް ކުރިއަށް ގެންދާ ސްޓޭޑިއަމް ސަރަހައްދުގެ އިތުރުން ހިތަދޫ ޕޯޓްސް ލިމިޓެޑް ކުރިމައްޗާއި އައްޑޫ ނޭޗަ ޕާކް ސަރަހައްދާއި ހިތަދޫ ބަނދަރު ސަރަހައްދާއި ޝަރަފުއްދީން ސްކޫލް/ގައުމީ ޔުނިވަސިޓީ ކޭމްޕަސް ސަރަހައްދާއި އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ސަރަހައްދެވެ.
އެހެން އަވަށްތައް ކަމަށްވާ ފޭދޫ، މަރަދޫފޭދޫ، މަރަދޫ، ހުޅުދޫ އަދި މީދޫން ސާފުކުރަން ހަމަޖެހިފައި ވަނީ އަވަށު އޮފީސްތަކުގެ ކުރިމައްޗަށެވެ. މީގެ އިތުރުން ގަން ވެސް ސާފުކުރާނެ އެވެ.
ކައުންސިލުން ބުނީ މި ޕްރޮގްރާމުގައި އައްޑޫގެ ވީހާ ވެސް ގިނަ ބަޔަކު ބައިވެރިވުމަކީ ވަރަށް ބޮޑު އެދުމެއް ކަމަށެވެ.
އިންޓަ-ސްކޫލް އެތުލެޓިކްސް މީޓްސް އޮންނާނީ މި މަހުގެ 11-16 އަށެވެ. މީގައި ރާއްޖޭގެ އެކި ހިސާބުތަކުން 37 ސްކޫލެއް ބައިވެރިވެ އެވެ.