ބޭންކް އޮފް މޯލްޑިވްސް (ބީއެމްއެލް) އިން ނަގާފައިވާ ލޯނުތައް ނުދެއްކުމުން ނަގާ އޯވަޑިއު އިންޓަރެސްޓް ރޭޓް ދަށްކޮށްފި އެވެ.
އޯވަޑިއު އިންޓަރެސްޓްގެ ގޮތުގައި އެންމެ ފަހުން ނެގީ ދެ ޕަސަންޓެވެ. ނަމަވެސް މިހާރު ވަނީ އެ އަދަދު 0.5 ޕަސަންޓަށް ދަށްކޮށްފަ އެވެ. ގައުމީ ބޭންކުން ބުނީ އެ ބަދަލު ގެންނަން ނިންމީ މިދިޔަ މަހުގެ 24 ގައި ބޭއްވި ބޯޑު މެންބަރުންގެ ބައްދަލުވުމުގައި ކަމަށެވެ.
ބީއެމްއެލް އިން އޯވަޑިއު އިންޓަރެސްޓަށް ނަގަމުން ދިޔަ އަދަދު މިދިޔަ އަހަރުގެ އޭޕްރީލް މަހު ދެ ޕަސަންޓަށް ކުޑަކުރުމުގެ ކުރިން ނަގަމުން ދިޔައީ 10 ޕަސަންޓެވެ.
އޯވަޑިއު އިންޓަރެސްޓް ކުޑަކުރިޔަސް ލޯނުތަކަށް ގަވައިދުން ފައިސާ ދެއްކުމަށް ބީއެމްއެލް އިން އިލްތިމާސްކޮށްފައިވެ އެވެ.