ރާއްޖޭގައި ތިބި އިންޑިއާ ސިފައިން ބޭލުމާ ގުޅޭ ދެވަނަ މަޝްވަރާ އަށް ސަރުކާރުގެ ޓީމެއް އިންޑިއާ އަށް ހިނގައްޖެ އެެވެ.
މިކަން ފޮރިން މިނިސްޓްރީކަން ކަށަވަރުކޮށް ދިން ނަމަވެސް އިންޑިއާ އަށް ދިޔައީ ކިތައް ބޭފުޅުންގެ ޓީމެއް ކަމާއި އޭގައި ހިމެނޭ ބަޔަކާ ބެހޭ އެއްވެސް މައުލޫމާތެއް ހާމަކޮށްފައެއް ނުވެ އެވެ.
ސިފައިން ބޭލުމާ ގުޅޭ މަޝްވަރާ އަށް ދެ ގައުމު އެކުވެގެން މަތީފަންތީގެ "ކޯ ގްރޫޕެއް" އެކުލަވާލައި، އޭގެ ފުރަތަމަ މަޝްވަރާ މިދިޔަ މަހުގެ 14 ގައި ބޭއްވީ ރާއްޖޭގަ އެވެ. އަދި އޭގެ ދަވަނަ ބައްދަލުވުން އިންޑިއާގައި ބާއްވަން ނިންމީ އެ ގައުމުގެ ސަރުކާރުން އެގޮތަށް ބޭނުންވެގެންނެވެ.
ރާއްޖޭގައި ތިބި އިންޑިއާ ސިފައިން ފޮނުވާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެގޮތުން ނޮވެމްބަރު 17 ގައި ރައީސްކަމުގެ ހުވާކުރެއްވުމަށް ފަހު، ހަމަ އެ ދުވަހު އިންޑިއާ ސިފައިން ގެންދަން އެ ގައުޖުމުގައި އެދިވަޑައިގަތެވެ. ސަރުކާރުގެ މިހާރުގެ އަމާޒަކީ އަންނަ މަހުގެ 15 ގެ ކުރިން އިންޑިއާ ސިފައިން ފޮނުވާލުމެވެ.
އެ ގައުމުގެ 80 އަށް ވުރެ ގިނަ ސިފައިން ރާއްޖޭގައި ތިބި ކަމަށް ސަރުކާރުން ބުނެ އެވެ.