މާޗް މަހު ބާއްވަން ހަމަޖެހިފައިވާ ރައްޔިތުންގެ މަޖިލިސް އިންތިހާބުގައި ބަހައްޓާނީ ޖުމްލަ 608 ވޯޓްފޮށި ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އެ ކޮމިޝަނުން ބުނީ އަތޮޅުތަކުގައި 319 ފޮއްޓެއް ބަހައްޓާ އިރު، މާލެ ސަރަހައްދުގައި 240 ވޯޓުފޮށި ބަހައްޓާނެ ކަމަށެވެ. އެއީ މާލޭގައި 181 ވޯޓުފޮށި، ހުޅުމާލޭގައި 50 ވޯޓުފޮށި، އަދި ވިލިމާލޭގައި ނުވަ ފޮއްޓެވެ. މާލޭގައި ބަހައްޓާ 181 ވޯޓު ފޮށީގެ ތެރެއިން މާލޭގެ ރައްޔިތުން ވޯޓުލާން 73 ފޮށި ބަހައްޓާ އިރު، އަތޮޅުތަކުގެ ރައްޔިތުން ވޯޓުލާން 108 ފޮއްޓެއް ބަހައްޓާނެ އެވެ.
އީސީން ބުނީ ރިސޯޓްތަކުގެ ތެރެއިން ވޯޓްފޮށި ބަހައްޓާނީ 37 ތަނުގައި ކަމަށެވެ. މީގެ އިތުރުން ޖަލުތަކުގެ ތެރެއިން މާފުށީ ޖަލުގައި ދެ ވޯޓުފޮށި، އައްސޭރި ޖަލުގައި އެއް ފޮށި، ހުޅުމާލެ ޖަލުގައި އެއް ފޮށި އަދި ދޫނިދޫ ޖަލުގައި އެއް ފޮށި ބަހައްޓާނެ އެވެ. އަދި ސިނާއީ ސަރަހައްދުގެ ތެރެއިން ހުޅުލޭގައި ފޮއްޓެއް ބަހައްޓާނެ އެވެ.
މި ފަހަރު ވެސް ހަ ގައުމެއްގައި ވޯޓްފޮށި ބަހައްޓާނެ އެވެ. އެއީ އިންޑިއާގެ ޓްރިވަންޑްރަމާއި މެލޭޝިއާގެ ކުއަލަލަމްޕޫރާއި ސްރީ ލަންކާގެ ކޮލަމްބޯ އާއި ތައިލެންޑްގެ ބެންކޮކާއި އިނގިރޭސިވިލާތުގެ ލަންޑަންގެ އިތުރުން ދުބާއީގަ އެވެ. މިއިން ކޮންމެ ތަނެއްގައި ބަހައްޓާނީ އެއް ފޮއްޓެވެ.
މަޖިލިސް އިންތިހާބު އޮންނާނީ އަންނަ މަހުގެ 17 ގަ އެވެ. މި އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެ އެވެ.