ރާއްޖޭގެ ކަނޑުގެ ސަރަހައްދުގައި ރާއްޖޭގެ މަސްދޯނިތަކަށް އިންޑިއާގެ ކޯސްޓްގާޑުން އެރި މައްސަލަ ހޫނުވެފައި ވަނިކޮށް، މިފަދަ އިތުރު ހާދިސާއެއް ވެސް ހިނގައިފި އެވެ.
އެގޮތުން މި މަހުގެ 1 ވަނަ ދުވަހު އަރާފައި ވަނީ ކުރިން ވެސް އެރި ހއ. އިހަވަންދޫ "މާހޯރަ 3" އަށެވެ. އިންޑިއާ ސިފައިން ކުރިން އަރާފައި ވަނީ އެ ދޯނީގެ އިތުރުން "އަސުރުމާ 3" އާއި "ނިރު 7" އަށެވެ.
މާހޯރަ 3" އަށް އެރި ހާދިސާއާ ގުޅިގެން ބޮޑު ކަންނެލި މަސްވެރިންގެ ޔޫނިއަނުން މިއަދު ބުނީ "މާހޯރަ 3" ދަތުރު ކުރަމުން ދަނިކޮށް ރާއްޖޭގެ ސަރަހައްދުގައި މޮޅަދޫ ބޮޔާއި 3 މޭލު ހިސާބުން ރޭގަނޑު 12 ޖެހިއިރު އިންޑިޔާގެ މަނަވަރެއް ކައިރިކޮށް ދޯންޏައް އަރައި ޗެކްކޮށް މަސްވެރިންނަށް ވަނީ ބިރު ދައްކާފައިވާ ކަމަށެވެ.
"މި މައްސަލަ ދޯނީގެ ފަރާތުން ވާނީ ކޯސްޓްގާޑާ ހިއްސާކޮށްފައި. ރާއްޖޭގެ ކަނޑުގެ ސަރަހައްދުގައި ދިވެހި މަސްވެރިންނަށް ރައްކާތެރިކަން ކަށަވަރު ކުރުމަށް ކަމާބެހޭ ފަރާތްތަކަށް ގޮވާލަން."
ދޯނިތަކަށް އިންޑިއާ ސިފައިން އެރި މައްސަލާގައި ޑިފެންސް މިނިސްޓްރީން ރޭ ނެރުނު ބަޔާނެއްގައި ބުނީ ރާއްޖޭގެ ހާއްސަ އިގްތިސާދީ ސަރަހައްދުގެ ތެރޭގައި މަސްވެރިކަން ކުރަމުންދިޔަ ރާއްޖޭގެ މަސްދޯނިތަކަށް އަރާފައި ވަނީ އިންޑިއާގެ ކޯސްޓްގާޑު ޝިޕް 246 އަދި އިންޑިއާ ކޯސްޓްގާޑް ޝިޕް 253 އަށް ނިސްބަތްވާ ބޯޑިން ޓީމުތަކަކުން ކަމަށެވެ.
ރާއްޖޭގެ ހާއްސަ އިގްތިސާދީ ސަރަހައްދުގައި މަސްވެރިކަން ކުރަމުން ދިޔަ ދިވެހި މަސްދޯނިތަކަށް ރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއް ނެތި ބައިނަލްއަގުވާމީ ކަނޑުގެ ގާނޫނުތަކާއި އުސޫލުތަކާ ހިލާފަށް އިންޑިއާގެ އަސްކަރިއްޔާ އިން ހިންގި އޮޕަރޭޝަންގެ ތަފްސީލު ދިނުމަށް ރާއްޖޭގެ ހާރިޖީ ވުޒާރާ މެދުވެރިކޮށް އިންޑިއާ ސަރުކާރުގައި އިއްޔެ ރަސްމީކޮށް ދަންނަވާފައިވާނެ ކަމަށް މިނިސްޓްރީން ބުންޏެވެ.
މިނިސްޓްރީގެ ބަޔާނުގައި ވަނީ ރާއްޖޭގެ ކަނޑުގެ ސަރަހައްދާއި ހާއްސަ އިގްތިސާދީ ސަރަހައްދު ހިމާޔަތްކޮށް ރައްކާތެރި ކުރުމުގެ މަސައްކަތްތައް ކެނޑިނޭޅި ކުރާނެ ކަމަށް ވެސް ބުނެފަ އެވެ.