ރައްޔިތުންގެ މަޖިލިސް އިންތިހާބުގައ ވާދަކުރަން މިދިޔަ މަހުގެ ފަހުކޮޅު ހުޅުވާލުމުން މިހާތަނަށް އަދި ފޯމް ހުށަހެޅީ އެންމެ ދެ ކެންޑިޑޭޓަކު ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
މަޖިލިސް އިންތިހާބަށް ހުޅުވައިލީ މިދިޔަ މަހުގެ 30 ގަ އެވެ. އަދި ސުންގަޑި ހަމަވާނީ މި މަހުގެ 14 އަށެވެ.
އީސީގެ ނައިބު ރައީސް އިސްމާއިލް ހަބީބް މިއަދު "އެކްސް" ގެ ޕޯސްޓެއްގައި ވިދާޅުވީ، މަޖިލިސް އިންތިހާބުގައި ވާދަކުރުމަށް ހުޅުވާލި ފުރުސަތުގައި މިހާތަނަށް އެ ކޮމިޝަނަށް ލިބިފައި ވަނީ ގަމު ދާއިރާގެ އިތުރުން ނިލަންދޫ ދާއިރާއަށް އަމިއްލަ ގޮތުން ވާދަކުރައްވާ ދެ ކެންޑިޑޭޓެއްގެ ފޯމް އެކަނި ކަމަށެވެ.
"މި ދެ ހުށަހެޅުންވެސް ބަލައިގަނެ، އެ ދެފަރާތަށް އިލެކްޝަންސް ކޮމިޝަނުން މިހާރުވަނީ ޖަވާބު އަރުވާފައި." އޭނަ ވިދާޅުވި އެވެ.
ފޯމް ބަލައިގަންނަނީ ދަރުބާރުގޭގެ ރަންނަބަނޑޭރި މާލަމުން ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން މެންދުރު ފަހު 2:00 އަށެވެ. އަދި ހުކުރު ދުވަހު މެންދުރު ފަހު 02:00 އިން ހަވީރު 4:00 ޖެހުމާ ހަމައަށް ފޯމް ބަލައި ގަންނާނެ އެވެ. އެޕްލިކޭޝަން ބަލައިގަންނާނެ ކަމަށް އީސީން ބުނެ އެވެ.
ފޯމް އީސީގެ ވެބްސައިޓުން ޑައުންލޯޑްކުރެވޭނެ އެވެ.
އަންނަ މަހުގެ 17 ގައި ބާއްވާ އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެ އެވެ.