މި އަހަރުގެ ކުރިއަށް ހުރި ފިލްމްތަކުގެ ތެރެއިން ސުޖިތު ސިރްކާސް ޑައިރެކްޓްކޮށްފައިވާ "ޕީކޫ" ގެ ފުރަތަމަ ޓްރެއިލާ އާއ ޕޯސްޓަރުތައް މިހާރު ވަނީ އާންމުކޮށްފަ އެވެ.
މެއި މަހުގެ 8 ވަނަ ދުވަހު ރިލީޒް ކުރަން ހަމަޖެހިފައިވާ މި ފިލްމަކީ ވަރަށް ހިތްގައިމު ފިލްމަކަށް ވާނެ ކަމަށް ޓްރެއިލާ ބެި ފަރާތްތަކުން ވަނީ ފާހަގަކޮށްގަ އެވެ.
ފިލްމުގެ އެންމެ ހާއްސަ އެއް ކަމަކީ ވަރަށް އާދައިގެ ދިރިއުޅުމެއް ފިލްމުގައި ދައްކުވައި ދިނުމެވެ.
ދީޕިކާ ޓައިޓްލް ރޯލް ކުޅޭ މި ފިލްމަކީ އުމުރުން ދުވަސްވެފައިވާ ބައްޕައަކު ބެލުމުގެ ޒިންމާ އާއި ކާމިޔާބު އާކިޓެކްޓެއްގެ ވަޒީފާ ވެސް އަދާ ކުރަމުން އަންނަ ޒުވާން އަންހެން ކުއްޖެއްގެ ވާހަކަ ކިޔައިދޭ ފިލްމެކެވެ.
ހާއްސަކޮށް މި ފިލްމަކީ ބައްޕައަކާއި އޭނާގެ އަންހެން ދަރިފުޅާ ދެމެދު އޮންނަ ވަރުގަދަ ގުޅުން ދައްކުވައި ދޭނެ ފިލްމެކެވެ.
މި ފިލްމުގައި ދީޕިކާގެ ބައްޕަގެ ރޯލް ކުޅެފައި ވަނީ އަމީތާބް ބައްޗަން އެވެެ. އަދި ދީޕިކާގެ ލޯބިވެރިޔާގެ ރޯލް "ޕީކޫ" ގައި ކުޅެފައި ވަނީ އިރްފާން ހާނެވެ.
މި ފިލްމަކީ "ވިކީ ޑޯނާ" އާއި "މެޑްރާސް ކެފޭ" ފަދަ ކާމިޔާބު ފިލްމުތަކަށް ފަހު ސުޖިތު ގެނެސްދޭ ފުރަތަމަ ފިލްމެވެ.
"ޕީކޫ" ޑިސްޓްރިބިއުޓް ކުރުމުގެ ޒިންމާ އާ ހަވާލުވެފައި ވަނީ އިންޑިއާގެ އެންމެ ބޮޑު ޕްރޮޑަކްޝަން ހައުސް ކަމަށްވާ ޔާޝްރާޖް ފިލްމްސް (ވައިއާރްއެފް) އިންނެވެ.