އިއްޔެ ބޭއްވި އެމްޑީޕީގެ ޕްރައިމަރީ ވަރަށް ފުރިހަމަ ކަމަށް އެ ޕާޓީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެ އެވެ.
މާޗް މަހު ބާއްވާ މަޖިލިސް އިންތިހާބުގައި އެ ޕާޓީން ވާދަކުރާނެ ކެންޑިޑޭޓުން ހޮވަން ބޭއްވުމަށް ބޭއްވި ޕްރައިމަރީއާ ގުޅޭ ގޮތުން ކުރީގެ އިކޮނޮމިކް މިނިސްޓަރު ސޯޝަލް މީޑިއާ ޕޯސްޓެއްގައި ވިދާޅުވީ އިއްޔެގެ ޕްރައިމަރީ އަކީ ޑިމޮކްރެޓިކް ފުރިހަމަ ހަރަކާތެއް ކަމަށެވެ.
"[އެކަން] އެމްޑީޕީން މި ނިންމާލީ ވަރަށް ސުލްހަވެރިކޮށް. މި ޕްރައިމަރީ ކާމިޔާބުކަމާ އެކީ ކުރިއަށް ގެންގޮސް މަސައްކަތްކޮށް ދެއްވި ޕާޓީގެ އެންމެހާ މެންބަރުންނަށް ޝުކުރު ދަންނަވަން." ފައްޔާޒް ވިދާޅުވި އެވެ.
އޭނަ ވަނީ ޕްރައިމަރީ ކާމިޔާބުކުރި ހުރިހާ ކެންޑިޑޭޓުންނަށް މަރުހަބާ ވެސް ވިދާޅުވެފަ އެވެ.
ޑިމޮކްރެޓިކް ފުރިހަމަ ހަރަކާތެއް މިއަދު އެމްޑީޕީއިން މިނިންމާލީ ވަރަށް ސުލްހަވެރިކޮށް. މި ޕްރައިމަރީ ކާމިޔާބުކަމާ
އެކީ ކުރިއަށް ގެންގޮސް މަސައްކަތްކޮއްދެއްވި ޕާޓީގެ އެންމެހާ މެންބަރުންނަށް ޝުކުރުދަންނަވަން. ޕާޓީގެ ޓިކެޓު ކާމިޔާބުކުރެއްވި ހުރިހާ ކެނޑިޑޭޓުންނަށް މަރުހަބާ!— Fayyaz Ismail (@faya_i) February 3, 2024
އެމްޑީޕީގެ ޕްރައިމަރީ ބޭއްވީ 40 ދާއިރާއަކަށް ބޭއްވި އިރު، ޕްރައިމަރީއާ ނުލައި ގިނަ ބޭފުޅުންތަކަކަށް ޓިކެޓް ކަށަވަރު ވެސް ވެފައިވެ އެވެ. ޕްރައިމަރީ ބޭއްވި 40 ދާއިރާ އަށް 149 ކެންޑިޑޭޓުން ވާދަކުރި އެވެ. ޕްރައިމަރީގައި އެމްޑީޕީގެ 25،325 މެންބަރަކަށް ވޯޓު ލުމުގެ ހައްގު ލިބުނެވެ. ޕްރައިމަރީގެ ވޯޓްލުން ކުރިއަށް ގެންދިޔައީ ހެނދުނު 9:00 އިން ހަވީރު 5:00 އަށެވެ.
ޕްރައިމަރީ އަށް ޖުމްލަ 122 ވޯޓްފޮށި ބެހެއްޓި އެވެ. އެއީ އަތޮޅުތެރޭގައި ބެހެއްޓި 95 ފޮއްޓާއި މާލޭގައި ބެހެއްޓީ 27 ފޮއްޓާ އެކީގަ އެވެ.
މަޖިލިސް އިންތިހާބު އޮންނާނީ މާޗް 17 ގަ އެވެ.