ޗައިނާ އަކީ މިހާރު ރާއްޖޭގެ އެއްވަނަ މާކެޓް

ރާއްޖެ އަށް އެންމެ ގިނަ ޓޫރިސްޓުން އަންނަ ގައުމަކަށް ޗައިނާވެއްޖެ އެވެ.

އެ ގައުމުން އަންނަ ޓޫރިސްޓުން މި އަހަރު ފެށުނު ފަހުން ބާރަށް އިތުރުވަމުން ގޮސް، ޓޫރިޒަމް މިނިސްޓްރީން އެންމެ ފަހުން އާންމުކުރި ތަފާސްހިސާބުތައް ދައްކާ ގޮތުން އިއްޔެއާ ހަމައަށް ޗައިނާ އިން ރާއްޖެ އައި ޓޫރިސްޓުންގެ އަދަދު ވަނީ 23،972 އަށް އަރައިފަ އެވެ. މިއާ އެކީ އެ ގައުމު މިހާރު އޮތީ އެންމެ ގިނަ ޓޫރިސްޓުން އަންނަ 10 ގައުމުގެ އެއްވަނައިގަ އެވެ.

މި ޓާގެޓަށް ވާސިލުވެފައި މި ވަނީ މިދިޔަ މަހު ރައީސް ޑރ. މުހައްމަދު މުއިއްޒު ޗައިނާ އަށް ކުރެއްވި ދަތުރުގައި ރާއްޖޭގެ އެއްވަނަ މާކެޓަށް ޗައިނާ ހަދައި ދޭން ވެސް އެދިވަޑައިގެންފައި ވަނިކޮށެވެ.

ޗައިނާ އަކީ މިދިޔަ އަހަރު ތިން ވަނަ އަށް އެންމެ ގިނަ ޓޫރިސްޓުން ރާއްޖެ އައި ގައުމެވެ.

މި މަހުގެ 3 އާ ހަމައަށް ރާއްޖެ އަށް 214،470 ޓޫރިސްޓުން އައިސްފައިވާ އިރު، 21،898 ޓޫރިސްޓުންނާ އެކީ ރަޝިއާ އޮތީ ދެވަނައިގަ އެވެ. އެ ގައުމަކީ މިދިޔަ އަހަރުގެ ތިން ވަނަ އެވެ. މިހާރު ތިންވަބައިގައި އޮތް އިޓަލީން އައި ޓޫރިސްޓުންގެ އަދަދު 21،321 އަށް އަރަ އެވެ.

ގަދަ 10 ގައި ދެން ހިމެނޭ ގައުމުތަކުގެ ތަރުތީބަކީ މިއެވެ؛ އިނގިރޭސިވިލާތް (18،078 ޓޫރިސްޓުން)، އިންޑިއާ (16،536 ޓޫރިސްޓުން)، ޖަރުމަން (12،842 ޓޫރިސްޓުން)، ފްރާންސް (7،624 ޓޫރިސްޓުން)، އެމެރިކާ (7،452 ޓޫރިސްޓުން)، ޕޮލެންޑް (6،063 ޓޫރިސްޓުން) އަދި ސްވިޓްޒަލޭންޑް (4،211 ޓޫރިސްޓުން) އެވެ.

ރާއްޖެ އިން މިހާރު އަމާޒު ހިފާފައި އޮތީ މަދުވެގެން 2.3 މިލިއަން ޓޫރިސްޓުން ގެނައުމެވެ.