ރާއްޖޭގައި ކިޔަވައި ދޭން ގެންނަ ބިދޭސީ ޓީޗަރުންގެ ސަނަދުތައް ކައުންސިލްތަކުން ވެލިޑޭޓްކުރަން ހުށަހެޅުމުގެ ބަދަލުގައި އެކަން އެ ޓީޗަރަކު މަސައްކަތްކުރާ ސްކޫލަކުން ކުރާ ގޮތަށް ހަމަޖައްސައިފި އެވެ.
މި ބަދަލަށް އަމަލު ކުރަން ނިންމީ އިއްޔެއިިން ފެށިގެން ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ބުންޏެވެ.
އެތަނުން ބުނީ ބިދޭސީ ޓީޗަރުންގެ ސަނަދުތައް ވެލިޑޭޓް ކުރަން ސްކޫލުތަކުން ހުށަހަޅާ އިރު، އެޓެސްޓްކޮށްފައިވާ ސަނަދުތަކާއި އަދި އެހެނިހެން ލިޔެކިޔުންތަކުގެ އެއް ކޮޕީ ސެޓާއި، އެޓެސްޓްކޮށްފައި ނުވާ ސަނަދުތަކުގެ އެއް ކޮޕީސެޓް ހުށަހަޅަން ޖެހޭނެ ކަމަށެވެ. އެގޮތަށް ފޮނުވާ އިރު އެ ސްކޫލެއްގެ އެޗްއާރް މެއިލް މެދުވެރިކޮށް ފޮނުވުމަށާއި އެކަމަށް ޚާއްޞަ "އެޕްލިކޭޝަން" ފޯމުގައި ސޮއިކޮށް، އެ ސްކޫލެއްގެ ތައްގަނޑު ޖަހައި، ހުށަހަޅަން ހުރިހާ ލިޔެކިޔުންތައް ހުށަހެޅުމަށް ސަމާލުކަން ދޭން އެދިފައުވެ އެވެ.
އެމްކިއުއޭ އިން ބުނިގޮތުގައި އީމެއިލްކޮށް ލިޔުންތައް ހުށަހެޅި ނަމަވެސް އެ ސަނަދެއްގެ ފެންވަރު ބަލައި ނިންމާނީ، ފޯމުގައި ހުށަހެޅުމަށް ބުނެފައިވާ ލިޔެކިޔުންތައް ފުރިހަމަ އަށް ހުށަހަޅާފައިވާ ނަމަ އެވެ. އަދި ވެލިޑޭޓްކޮށް ތައްގަނޑު ޖަހާފައިވާ ކޮޕީ ދޫކުރަން ހަމަޖެފިފައި ވަނީ އެ އޮތޯރިޓީގެ ކައުންޓަރުންނެވެ.
ވެލިޑޭޓް ތައްގަނޑު ޖަހާފައިވާ ކޮޕީ ބަލައި ދާ އިރު އެ ސަނަދެއްގެ ސައްޙަކަން ޔަގީން ކުރުމަށްޓަކައި އެ ސަނަދެއްގެ އަސްލު ދައްކަން ޖެހޭނެ ކަމަށް ވެސް އެމްކިއުއޭ އިން ބުންޏެވެ.