ސަރުކާރުގެ މި އަހަރުގެ އެއް އަމާޒަކީ 20 ރިސޯޓް ހުޅުވުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު މިއަދު ރައްޔިތުންގެ މަޖިލީހުގައި ދެއްވި ފުރަތަމަ ރިޔާސީ ބަޔާނުގައި ވިދާޅުވީ 20 ރިސޯޓަކީ ރާއްޖޭގެ ބެޑް ކެޕޭސިޓީ އަށް އިތުރު 2،857 ނެރެވޭނެ ކަމަށެވެ. މިހާރު ރާއްޖޭގެ ބެޑް ކެޕޭސިޓީ އުޅެނީ 42،000 ގަ އެވެ.
ރައީސް ވިދާޅުވީ ނުހެދި ހުރި ރިސޯޓްތައް ނިންމަން ފުރުސަތުތައް ފަހިކޮށްދީ، ޓޫރިޒަމަށް ހާއްސަކޮށްގެން ކުއްޔަށް ދޫކޮށްފައިވާ ރަށްރަށާއި ބިންބިމާއި ފަޅުތަކުގެ ތެރެއިން، އެކިއެކި ސަބަބުތަކާއި ހެދި މަސައްކަތް ހުއްޓިފައިވާ ތަންތަން ތަރައްގީކުރުމަށް ހުރި ދަތިތަކާއި ހުރަސްތައް ބަލައި އެކަންކަމަށް ހައްލުތައް ދެނެގަތުމުގެ މަސައްކަތް ސަރުކާރުން މިހާރު ކުރަމުން އަންނަ ކަމަށެވެ.
އެގޮތުން ޓޫރިޒަމް ތަރައްގީކުރަން ދޫކޮށްފައިވާ 63 މަޝްރޫއެއް ނިންމައި މާކެޓަށް ނެރުމަށް ޓޫރިޒަމް މިނިސްޓްރީ އާއި ފިނޭންސް މިނިސްޓްރީއާއި މީރާ އަދި އިކޮނޮމިކް ކައުންސިލް ގުޅިގެން ސިޔާސަތެއް މިހާރު އެކުލަވާލަމުން އަންނަ ކަމަށް ވެސް ރައީސް ވިދާޅުވި އެވެ. ވެ
"އިރާދަކުރެއްވިއްޔާ ކުރިޔަށް އޮތް ހަފުތާއެއްހާ ދުވަހުގެ ތެރޭގައި އެ މަސައްކަތް ނިމޭނެ." ރައީސް ވިދާޅުވި އެވެ.
ރައްޖޭގައި މިހާރު 175 ރިސޯޓެއް ހިންގަ އެވެ.
ސަރުކާރުން މި އަހަރު އަމާޒު ހިފާފައި އަހަރު ނިމުމުގެ ކުރިން 2.3 މިލިއަން ޓޫރިސްޓުން ގެނައުމަށެވެ.