އައްޑޫން ދޫކުރަން ނިންމި ބަންޑާރަ ގޯތި ލިބުނު މީހުންގެ މެދުގައި އަންނަ ބުދަ ދުވަހުން ފެށިގެން ގުރުލުން ކުރިއަށް ގެންދަން ނިންމައިފި އެވެ.
ކައުންސިލުން މިއަދު ބުނީ ބަންޑާރަ ގޯތި ދިނުމަށް ބިންތައް އެކަށައެޅޭ ނިސްބަތުން ލިސްޓުގައިވާ ތަރުތީބުން ގުރުއަތުލުމުގެ މަސައްކަތް ކުރިއަށް ގެންދަން ނިންމާފައިވާ ކަމަށެވެ. ކައުންސިލުން ބުނީ ގުރުލުން ކުރިއަށް ގެންދާ އިރު، އެއް އަވަށަށް ވުރެ ގިނަ އަވަށްތަކުން ގޯތި ލިބުމަށް ޝަރުޠު ހަމަވެ، އެތަނުން ގޯތި ބޭނުންވާ އަވަށް އިހުތިޔާރު ނުކުރާ މީހުންނަށް ގޯތި ދޭން ހަމަޖެހިފައި ވަނީ އެ މީހަކު ރަށްވެހިވެފައިވާ އަވަށުން ކަމަށާއި އެ މީހުން ލިސްޓުގައި ހިމަނައި، ބާކީ ހުރި ލިސްޓުތަކުން މީހުން ނަންތައް އުނިކުރެވޭނެ ކަމަށެވެ.
މިދިޔަ އަހަރު އައްޑޫން ގޯތި ދޭން ނިންމީ ހަތަރު އަވަށަކުންނެވެ. އެއީ ހިތަދު އާއި ފޭދޫގެ އިތުރުން ވަކިން އޮންނަ ހުޅުދު އާއި މީދޫންނެވެ. މިއިން ކޮންމެ އަވަށަކުން ވެސް ގޯތި ދޭން ނިންމީ ދެ ކެޓަގަރީއަކުންނެވެ. އެއީ އެ އަވަށެއްގެ ރަށްވެހިންނާއި އެހެން އަވަށްތަކުގެ ރަށްވެހިންނަށް ވެސް ގޯތި ދޭ ގޮތަށެވެ.
ގޯތި ދޫނުކުރާތާ ގިނަ އަހަރުތަކެއް ފަހުން މިދިޔަ އަހަރުގެ ޖެނުއަރީގައި އައްޑޫން ދޫކުރަން އިއުލާންކުރީ ޖުމްލަ 1،000 ގޯއްޗެވެ. އެގޮތުން ހިތަދޫން ޖުމްލަ 500 ގޯއްޗަށް ހުޅުވާލި އިރު، ފޭދޫން ދޭން ނިންމީ 300 ގޯއްޗެވެ. އެއި ދެ އަވަށުން ވެސް ދޭން ނިންމީ 1،500 އަކަފޫޓްގެ ގޯއްޗެވެ. މީދު އާއި ހުޅުދޫން ކޮންމެ އަވަށަކުން 100 ގޯއްޗަށް ހުޅުވާލި އިރު، އެއީ 2،000 އަކަފޫޓްގެ ގޯއްޗެވެ.
ގޯތިތަކަށް ކުރިމަތިލާން ދިން މުއްދަތު ހަމަވި އިރު 4،000 އަށް ވުުރެ ގިނަ މީހުން ފޯމު ހުށަހެޅި އެވެ. އެހެންވެ ކައުންސިލުން ނިންމާފައި އޮތީ ޝަރުތު ހަމަވާ އެންމެންނަށް ވެސް ގޯތި ދޭށެވެ.