ކެންސަރު ބަލީގައި ނެމީބިއާގެ ރައީސް ހާގޭ ގައިންގޯބް އަވަހާރަވުމާ ގުޅިގެން އެކަމުގެ ހިތާމައިގައި ދިވެހި ދިދަ ބައި ދަނޑި އަށް ތިރިކުރަން ސަރުކާރުން ނިންމައިފި އެެވެ.
މި ކަން އިއުލާންކުރެއްވީ ރައީސް އޮފީހުން މިއަދު ނެރުއްވި އިއުލާނެއްގަ އެވެ. އޭގައި ބުނީ ހާގޭ އަވަހާރަވުމާ ގުޅިގެން އެކަމުގެ ހިތާމައިގައި، މާދަމަ އާއި އަނެއް ދުވަހު ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށެވެ.
އުމުރުން 82 އަހަރުގައި ހާގޭ އަވަހާރަވީ އިއްޔެ ހެނދުނު ވެ. އޭނަ އަވަހާރަވީ ސިއްހީ ހާލަތު ގޯސްވެގެން ހޮސްޕިޓަލްގައި އެޑްމިޓްކޮށް ފަރުވާ ދެމުން ދަނިކޮށެވެ. ހާގޭ އަށް ކެންސަރު ޖެހިފައިވާކަން އާންމުކޮށް އިއުލާންކުރީ މިދިޔަ މަހުގެ ތެރޭގަ އެވެ. އަދި އޭނަ އަވަހާރަވީ ފަރުވާ އަށް އެމެރިކާ އަށް ވަޑައިގަންނަވަން ވެސް ހަމަޖެހިފައި ވަނިކޮށެވެ.
ކުރިން ނެމީބިއާގެ ނައިބު ރައީސްކަމާއި ބޮޑުވަޒީރުކަމާއި މިނިސްޓަރުކަން ވެސް ކުރެއްވި ހާގޭ އެ ގައުމުގެ ތިން ވަނަ ރައީސްކަމުގެ މަގާމަށް ވަޑައިގެންނެވީ 2015 ގަ އެވެ.
ތިން ކައިވެންޏެއް ކުރެއްވި ހާގޭގެ ތިން ބޭފުޅުން ތިއްބަވަ އެވެ.