މި އަހަރުގެ ތެރޭގައި އާ ދެ އެއާޕޯޓެއް ހެދުމުގެ މަސައްކަތް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އިއްޔެ ދެއްވި ފުރަތަމަ ރިޔާސީ ބަޔާނުގައި އެ މަނިކުފާނު ވިދާޅުވީ ރާއްޖޭގެ އިގުތިސާދު ވަރުގަދަކުރުމަށްޓަކައި އެންމެ އިސްކަންދޭން ޖެހޭ އެއް ކަމަކީ ދަތުރުފަތުރުގެ ހިދުމަތް ފުޅާކުރުން ކަމަށެވެ.
"މިހާރު ބިނާކުރަމުންދާ ޑޮމެސްޓިކް އެއާޕޯޓްތަކުގެ މަސައްކަތް ނިންމަމުން ދިއުމުގެ އިތުރަށް، އާ ދެ އެއާޕޯޓްގެ މަސައްކަތް މި އަހަރުގެ ތެރޭގައި އަޅުގަނޑުމެން އިރާދަކުރެއްވިއްޔާ ފަށާނަން." ރައީސް ވިދާޅުވި އެވެ.
ނަމަވެސް އެއީ ކޮން އެއާޕޯޓްތަކަމެއް ވިދާޅެއް ނުވެ އެވެ.
މިދިޔަ އަހަރުގެ ރިޔާސީ އިންތިހާބުގެ ކެމްޕޭން ތެރޭގައި ރައީސް ވަނީ ބައެއް ރަށްރަށުގައި އެއާޕޯޓް އަޅުއްވައި ދެއްވާނެ ކަމަށް ވައުދު ވެސް ވެވަޑައިގެންފަ އެވެ.