ތ. އަތޮޅުގައި މި އަހަރު އިތުރު ރިސޯޓެއް ތަރައްގީ ކުރަން ފެށޭނެކަމުގެ ޔަގީންކަން އޮތް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު މިހާރު އެ އަތޮޅަށް ދަތުރެއް ކުރައްވަމުން ގެންދަވާ އިރު، ތ. އަތޮޅުގައި އިތުރު ރިސޯޓެއް މި ސަރުކާރުން ހަދާނެތޯ ރައީސަށް އާންމުންގެ މީހަކު ކުރި ސުވާލެއްގެ ޖަވާބުގައި ރައީސް ވިދާޅުވީ ވެރިކަމުގެ މި ދައުރުގެ ތެރޭގައި ތ. އަތޮޅަށް ގިނަ ރިސޯޓްތަކެއް ގެންނަވާނެކަމުގެ ޔަގީންކަން ދެއްވާ ކަމަށެވެ.
"އެއް ކަމަށް އެއާޕޯޓް އިތުރުކުރުން، މިހާރު އަޅުގަނޑު މިއޮތީ ގުރައިދޫގަައި އެއް އެއާޕޯޓް، ވިލިފުށީގައި އެއް އެއާޕޓް ހެދިގެން ދާނެ. އޭރުން ތިން އެއާޕޯޓް އައުމުން ކަނެކްޓިވިޓީ އިތުރުވެގެން އެބަދޭ. މުޅި އިގުތިސާދަށް މި ގެންނަ މަސައްކަތް ކުރާ ކުރިއެރުމުން ރާއްޖެ އަށް އަންނަ އިސްވެސްޓަރުން ގިނަވާނެ،" ރައީސް ވިދާޅުވި އެވެ. "މި އަތޮޅަށް ވަރަށް ޔަގީން މި އަހަރު ވެސް ރިސޯޓެއް ހެދުމުގެ މަސައްކަތް ފެށޭ ވަރުވާނެ. އަދި ފަސް އަހަރު ތެރެއަށް ބަހާލައިގެން ގިނަ ރިސޯޓްތަކެއް މުޅި އަތޮޅުގެ އެކި ހިސާބަށް އެދި ދާއިރާތައް ކަވަރުވާ ގޮތަށް ގެނެސް ދޭނަން."
ތ. އަތޮޅުގައި މިހާރު އޮންނަނީ އެންމެ ރިސޯޓެކެވެ. އެއީ ލަކްސް ސައުތު އަރި އެޓޯލް ރިސޯޓް އެންޑް ވިލާސް އެވެ.
ސަރުކާރުން ބުނެފައިވާ ގޮތުގައި އަމާޒަކީ މި އަހަރު ރާއްޖޭގައި 20 ރިސޯޓް ހުޅުވުމެވެ. ރާއްޖޭގައި މިހާރު 175 ރިސޯޓް އޮޕަރޭޓްކުރެ އެވެ.