ޕާކިސްތާންގެ ހިލޭ އެހީގައި ރާއްޖޭގެ ގައުމީ ޔުނިވަސިޓީގެ މެޑިކަލް ސްކޫލާއި ޓީޗީން ހޮސްޕިޓަލް ހަދައިދޭ ގޮތަށް ނިންމައިފަ އެވެ.
އެމްއެންޔޫގައި މިއަދު ބޭއްވި ރަސްމިއްޔާތެއްގައި އެ ދެ އިމާރާތުގެ ޑިޒައިން ވެސް ވަނީ ދައްކާލައިފަ އެވެ. ތިމާވެއްޓާ ރައްޓެހިކޮޑް ހަދާ މެޑިކަލް ސްކޫލާއި ޓީޗިން ހޮސްޕިޓަލް ޑިޒައިންކުރީ ޕާކިސްތާނުގެ އާތިފު ނަޒަރު ޕްރައިވެޓް ލިމިޓެޑުންނެވެ.
މެޑިކަލް ސްކޫލާއި ޓީޗިން ހޮސްޕިޓަލް އިމާރާތް ކުރަން ނިންމާފައި ވަނީ ހުޅުމާލޭގެ ދެވަނަ ފިޔަވަހީގައި 5،700 އަކަމީޓަރުގެ ސަރަހައްދެއްގަ އެވެ.
މެޑިކަލް ސްކޫލަކީ 100 ދަރިވަރުންނަށް ޖާގަ އާއި ޒަމާނީ ވަޞީލަތްތަކާ އެކީ ގާއިމުކުރަން ނިންމާފައިވާ ތަނެކެވެ. ޤާއިމް ޓީޗިންގ ހޮސްޕިޓަލް ހަދަނީ 300 އެނދުގެ ހޮސްޕިޓަލެއްގެ ގޮތަށް ބަލި މީހުންނަށް ޚިދުމަތް ވެސް ދެވޭ ފެންވަރަށް ޒަމާނީ ޓެކްނޮލޮޖީ އެކުލެވޭ ގޮތަށެވެ.
މި މަޝްރޫއުތަކާ ގުޅޭ ގޮތުބް ޕާކިސްތާނުން ރާއްޖެއަށް ކަނޑައަޅާފައިވާ ސަފީރު ވައިސް އެޑްމިރަލް މުޙައްމަދު ފައްޔާޒު ގިލާނީ ވިދާޅުވީ، މެޑިކަލް ސްކޫލާއި ޓީޗިންގހޮސްޕިޓަލަކީ ރާއްޖެ އާއި ޕާކިސްތާނާ ދެމެދު އޮތް ޒަމާންވީ ގުޅުމުގެ މިސާލެއް ކަމަށެވެ. އަދި އެ އިމާރާތުގެ މަސައްކަތް، މަސައްކަތް ފަށާތާ ދެ އަހަރާއި ބައިގެ ތެރޭގައި ނިންމައި 2027 ވަނަ އަހަރު ހުޅުވާނެ ކަމަށް ވިދާޅުވި އެވެ.
އެމްއެންޔޫގެ މެޑިކަލް ސްކޫލުގައި މިހާރު 300 އެއްހާ ދަރިވަރުން ކިޔަވަ އެވެ.